ಮನೆ ರಾಜ್ಯ ಜೋಗ ಜಲಪಾತದ ಸೌಂದರ್ಯ ಆನಂದಿಸುವುದರ ಜೊತೆಗೆ ಈ ಜಲಪಾತಗಳಿಗೂ ಭೇಟಿ ನೀಡಿ

ಜೋಗ ಜಲಪಾತದ ಸೌಂದರ್ಯ ಆನಂದಿಸುವುದರ ಜೊತೆಗೆ ಈ ಜಲಪಾತಗಳಿಗೂ ಭೇಟಿ ನೀಡಿ

August 19, 2022

ಕರ್ನಾಟಕದ ಮಂದಿಗೆ ಶಿವಮೊಗ್ಗದ ಪ್ರವಾಸವೆಂದರೆ ರೋಮಾಂಚಕಾರಿ ಎಂದೇ ಹೇಳಬಹುದು. ನಗರದಿಂದ ದೂರವಿದ್ದು, ಪ್ರಶಾಂತವಾದ ವಾತಾವರಣಕ್ಕೆ ಪ್ರವಾಸ ಯೋಜಿಸಲು ಬಯಸುತ್ತಾರೆ.

ನಿಜವಾದ ಪ್ರಾಕೃತಿಕ ವೈಭವವನ್ನು ಕಾಣಬೇಕಾದರೆ ಶಿವಮೊಗ್ಗದ ಪ್ರವಾಸ ಯೋಜಿಸಬೇಕು. ಹಾಲ್ನೊರೆಯಂತೆ ಧರೆಗೆ ಇಳಿಯುವ ಜಲಧಾರೆಗಳು ನೋಡುಗರನ್ನು ಒಂದು ಕ್ಷಣ ಬೆಕ್ಕಸ ಬೆರಗಾಗಿಸುತ್ತದೆ. ಇನ್ನು ನೀವು ಶಿವಮೊಗ್ಗಕ್ಕೆ ಹೋದಾಗ ಭಾರತದ ಅತಿ ಎತ್ತರದ ಜಲಪಾತಗಳಲ್ಲಿ ಒಂದಾದ ಜೋಗ ಜಲಪಾತವನ್ನು ಮಾತ್ರ ಕಣ್ತುಂಬಿಕೊಂಡು ಹಿಂದಿರುಗುತ್ತೀರಿ. ಆದರೆ ಜೋಗ ಜಲಪಾತ ಹೊರತುಪಡಿಸಿ ಇನ್ನು ರಮಣೀಯವಾದ ಜಲಪಾತಗಳು ಶಿವಮೊಗ್ಗದ ಪ್ರಾಕೃತಿಕ ಶ್ರೀಮಂತಿಕೆಯನ್ನು ಹೆಚ್ಚಿಸಿದೆ.

ಹಾಗಾದರೆ ಶಿವಮೊಗ್ಗದ ಪ್ರವಾಸ ಮತ್ತೊಮ್ಮೆ ಕೈಗೊಂಡಾಗ ಯಾವೆಲ್ಲಾ ಜಲಪಾತಗಳನ್ನು ಮಿಸ್ ಮಾಡಿಕೊಳ್ಳಬಾರದು ಎಂಬುದನ್ನು ಇಲ್ಲಿ ತಿಳಿಯಿರಿ.

ದಬ್ಬೆ ಜಲಪಾತ

ದಬ್ಬೆ ಜಲಪಾತವು ಹಚ್ಚ ಹಸಿರಿನಿಂದ ಸಮೃದ್ಧವಾಗಿರುವ ಶರಾವತಿ ವನ್ಯಜೀವಿ ಅಭಯಾರಣ್ಯದಲ್ಲಿ ನೆಲೆಸಿದೆ. ಶಿವಮೊಗ್ಗದ ಗುಪ್ತ ರತ್ನ ತಾಣಗಳಲ್ಲಿ ದಬ್ಬೆ ಜಲಪಾತವು ಒಂದಾಗಿದೆ. ದಟ್ಟವಾದ ಕಾಡಿನಲ್ಲಿ ಪ್ರಶಾಂತವಾಗಿ ಧುಮ್ಮಿಕ್ಕುವ ಜಲಪಾತವು ಪ್ರಕೃತಿ ಪ್ರೇಮಿಗಳನ್ನು ಆಕರ್ಷಿಸುತ್ತದೆ.

ರಾಮಾಯಣ ಮತ್ತು ಮಹಾಭಾರತಕ್ಕೆ ತಳುಕು ಹಾಕಿಕೊಂಡಿರುವ ಈ ಜಲಪಾತವು ಅತ್ಯಂತ ರಮಣೀಯವಾದ ಪ್ರವಾಸಿ ಆಕರ್ಷಣೆಯಾಗಿದೆ. ಇನ್ನು ಸಮ್ಮೋಹನಗೊಳಿಸುವ ಈ ಜಲಪಾತಕ್ಕೆ ನೀವು ಟ್ರೆಕ್ಕಿಂಗ್ ಕೈಗೊಳ್ಳುವ ಮೂಲಕ ಕೂಡ ತಲುಪಬಹುದು.

ಜೋಗ ಜಲಪಾತ

ಜೋಗ್ ಜಲಪಾತವು ಕರ್ನಾಟಕದ ಅತಿ ಎತ್ತರದ ಜಲಪಾತವಾಗಿದೆ. ಶಿವಮೊಗ್ಗದ ಪ್ರಮುಖವಾದ ಪ್ರವಾಸಿ ಆಕರ್ಷಣೆಗಳಲ್ಲಿ ಜೋಗ್ ಜಲಪಾತವು ಅಗ್ರಸ್ಥಾನದಲ್ಲಿದೆ. ಮಳೆಗಾಲದಲ್ಲಿ ಮೈದುಂಬಿ ಹರಿಯುವ ಈ ಜಲಪಾತದ ಸೌಂದರ್ಯವನ್ನು ಕಾಣಲು ದೇಶದ ವಿವಿಧ ಭಾಗಗಳಿಂದ ಪ್ರವಾಸಿಗರು ಭೇಟಿ ನೀಡುತ್ತಾರೆ.

ಜೋಗದ ಜಲಪಾತವನ್ನು ರಾಜಾ, ರಾಕೆಟ್, ರೋರರ್ ಮತ್ತು ರಾಣಿ ಎಂಬ 4 ಭಾಗಗಳಾಗಿ ವಿಂಗಡಿಸಲಾಗಿದೆ. ಇಂತಹ ಅಪೂರ್ವವಾದ ದೃಶ್ಯವನ್ನು ಕಾಣಲು ವಾರಾಂತ್ಯದ ಸಮಯದಲ್ಲಿ ಕರ್ನಾಟಕದ ಪ್ರವಾಸಿಗರು ಭೇಟಿ ನೀಡುತ್ತಿರುತ್ತಾರೆ.

ಬರ್ಕಣ ಜಲಪಾತ

ಶಿವಮೊಗ್ಗದಲ್ಲಿರುವ ಈ ಅದ್ಭುತವಾದ ಜಲಪಾತವು ಭಾರತದ ಅತ್ಯಂತ ಎತ್ತರದ ಜಲಪಾತಗಳಲ್ಲಿ ಒಂದಾಗಿದೆ. ಸೀತಾ ನದಿಯಿಂದ ಸೃಷ್ಠಿಯಾಗುವ ಈ ಜಲಪಾತವು ಸುಮಾರು 850 ಅಡಿ ಎತ್ತರದಿಂದ ಧುಮ್ಮಿಕ್ಕುತ್ತದೆ.

ಈ ಅದ್ಭುತವಾದ ಜಲಪಾತವು ಮಳೆಗಾಲದ ಸಮಯದಲ್ಲಿ ಮೈದುಂಬಿ ಹರಿಯುತ್ತದೆ. ಆಗುಂಬೆಯಿಂದ ಕೇವಲ 10 ಕಿ.ಮೀ ದೂರದಲ್ಲಿದ್ದು, ಟ್ರೆಕ್ಕಿಂಗ್ ಮಾಡಲು ಉತ್ಸಾಹ ಹೊಂದಿದ್ದರೆ ಕೈಗೊಳ್ಳಬಹುದು. ಬರ್ಕಣ ಜಲಪಾತವನ್ನು ನಿಮ್ಮ ಕ್ಯಾಮೆರಾದಲ್ಲಿ ಕ್ಲಿಕ್ಕಿಸಿಕೊಳ್ಳಲು ಚಳಿಗಾಲ ಬೆಸ್ಟ್ ಸಮಯವಾಗಿದೆ.

ಜೋಗಿಗುಂಡಿ ಜಲಪಾತ

ಶಿವಮೊಗ್ಗದ ಗುಪ್ತ ರತ್ನವಾಗಿರುವ ಜೋಗಿಗುಂಡಿ ಜಲಪಾತವು ಪಶ್ಚಿಮ ಘಟ್ಟಗಳ ದಟ್ಟವಾದ ಕಾಡುಗಳ ಮಧ್ಯಭಾಗದಲ್ಲಿ ನೆಲೆಸಿದೆ. ಇದು ಸಾಂಪ್ರದಾಯಿಕ ಜಲಪಾತಗಳಂತೆ ಎತ್ತರದಿಂದ ಬೀಳುವುದಿಲ್ಲ, ಬದಲಾಗಿ ಗುಹೆಯಿಂದ ಹುಟ್ಟಿ ಬೆಟ್ಟದ ಮೂಲಕ ಹಾದುಹೋಗುತ್ತದೆ. ನೀವು ಟ್ರೆಕ್ಕಿಂಗ್ ಮಾಡಲು ಬಯಸಿದರೆ ನಿಸ್ಸಂದೇಹವಾಗಿ ಈ ಜಲಪಾತವಿರುವ ತಾಣಕ್ಕೆ ಭೇಟಿ ನೀಡಬಹುದು.

ಕಡಿಮೆ ಕಷ್ಟದ ಜಲಪಾತ ಇದಾಗಿದ್ದು, ಪ್ರಕೃತಿಯನ್ನು ಅತಿಯಾಗಿ ಆನಂದಿಸುವವರಿಗೆ ಇದೊಂದು ಸ್ವರ್ಗ ಎಂದೇ ಹೇಳಬಹುದು. ಅಲ್ಲದೆ, ಇಲ್ಲಿ ನೀವು ಜಲಕ್ರೀಡೆಯನ್ನು ಅಂತ್ಯವಿಲ್ಲದೆ ಆನಂದಿಸಬಹುದು.

ಹಿಡ್ಲುಮನೆ ಜಲಪಾತ

ಶಿವಮೊಗ್ಗದ ಹಿಡ್ಲುಮನೆ ಜಲಪಾತವು ಪ್ರವಾಸಿಗರ ಸ್ವರ್ಗ ಎಂದೇ ಹೇಳಬಹುದು. ದಟ್ಟವಾದ ಮೂಕಾಂಬಿಕಾ ಅರಣ್ಯಗಳಲ್ಲಿ ನೆಲೆಗೊಂಡಿರುವ ಈ ಜಲಪಾತವು ಪ್ರಶಾಂತವಾದ ವಾತಾವರಣವನ್ನು ಸೃಷ್ಟಿಸುತ್ತದೆ. ಇತ್ತೀಚೆಗೆ ಹಿಡ್ಲುಮನೆ ಜಲಪಾತದಲ್ಲಿ ಈಜುವುದನ್ನು ನಿಷೇಧಿಸಲಾಗಿದೆ.

ಹಿಡ್ಲುಮನೆ ಜಲಪಾತವನ್ನು ಕಣ್ತುಂಬಿಕೊಂಡು ಕೊಡಚಾದ್ರಿ ಶಿಖರಕ್ಕೆ ಟ್ರೆಕ್ಕಿಂಗ್ ಯೋಜಿಸಬಹುದು. ಸೊಂಪಾದ ಕಾಡುಗಳಲ್ಲಿ ವೈವಿಧ್ಯಮಯ ಪ್ರಾಣಿ, ಪಕ್ಷಿಗಳನ್ನು ನೀವು ಕಾಣಬಹುದು.