ಲಕ್ನೋ: ಲಿವ್-ಇನ್-ರಿಲೇಶನ್‌ ಶಿಪ್‌ ನಲ್ಲಿರುವ ಮಹಿಳೆಗೆ ರಕ್ಷಣೆ ನೀಡಲು ನಿರಾಕರಿಸಿರುವ ಅಲಹಾಬಾದ್ ಹೈಕೋರ್ಟ್, ಇಂತಹ ಸಂಬಂಧಗಳಿಗೆ ರಕ್ಷಣೆ ನೀಡಿದರೆ ಸಮಾಜಕ್ಕೆ ಕೆಟ್ಟ ಸಂದೇಶ ರವಾನಿಸಿದಂತಾಗುತ್ತದೆ ಎಂದು ಅಭಿಪ್ರಾಯಪಟ್ಟಿದೆ.
ಇದೇ ವೇಳೆ ನಮ್ಮ ಲಿವ್-ಇನ್- ರಿಲೇಶನ್‌ ಪ್ ಗೆ ಪತಿ ತೊಂದರೆ ಕೊಡದಂತೆ ಆದೇಶಿಸಬೇಕು ಎಂಬ ಮನವಿಯನ್ನು ತಿರಸ್ಕರಿಸಿರುವ ಹೈಕೋರ್ಟ್, ಅರ್ಜಿದಾರರಿಗೆ 2 ಸಾವಿರ ರೂ.ದಂಡ ವಿಧಿಸಿದೆ.
25 ವರ್ಷದ ಹಿಂದೂ ಯುವಕನ ಜತೆ ವಾಸವಿರುವ 26 ವರ್ಷದ ಮುಸ್ಲಿಂ ಮಹಿಳೆ ತನ್ನ ಪತಿ ತನಗೆ ಮಾನಸಿಕ, ದೈಹಿಕ ಹಿಂಸೆ ಕೊಡುತ್ತಿದ್ದಾನೆ. ಹೀಗಾಗಿ 5 ವರ್ಷದ ಮಗಳೊಂದಿಗೆ ಪ್ರತ್ಯೇಕವಾಗಿ ವಾಸಿಸುತ್ತಿದ್ದೇನೆ. ಆದ್ದರಿಂದ ಪತಿಯಿಂದ ನನಗೆ ರಕ್ಷಣೆ ಕೊಡಿಸಬೇಕು, ತನ್ನ ನೆಮ್ಮದಿಯ ಜೀವನಕ್ಕೆ ತೊಂದರೆ ಕೊಡದಂತೆ ಆದೇಶಿಸಬೇಕು ಎಂದು ಕೋರಿದ್ದರು.
ಈ ಮನವಿ ತಿರಸ್ಕರಿಸಿರುವ ನ್ಯಾಯಮೂರ್ತಿ ರೇಣು ಅಗರ್ವಾಲ್, ಅರ್ಜಿದಾರ ಮಹಿಳೆ ಮದುವೆಯಾಗಿದ್ದು, ಡಿವೋರ್ಸ್ ಕೂಡ ಪಡೆದಿಲ್ಲ. ವಿವಾಹಿತ ಮುಸ್ಲಿಂ ಮಹಿಳೆಯು ವಿವಾಹೇತರ ಸಂಬಂಧ ಹೊಂದುವುದು ಅಥವಾ ಲಿವ್-ಇನ್ ಸಂಬಂಧದಲ್ಲಿ ಇರುವುದು ಕಾನೂನು ಸಮ್ಮತವಲ್ಲ. ಇಂತಹ ಸಂಬಂಧವು ಇಸ್ಲಾಂನಲ್ಲಿ ಝಿನಾ(ವ್ಯಭಿಚಾರ) ಮತ್ತು ಹರಾಮ್ (ನಿಷಿದ್ಧ) ಎನಿಸಿಕೊಳ್ಳುತ್ತದೆ ಎಂದು ಹೈಕೋರ್ಟ್ ಹೇಳಿದೆ.
