ಪ್ರತಿಯೊಬ್ಬರ ಬದುಕಿನ ಮೇಲೆ ಪ್ರಭಾವ ಬೀರುವ ಅಂಶಗಳಲ್ಲಿ ನಾವು ಇತರರೊಂದಿಗೆ ಹೇಗೆ ನಡೆದುಕೊಳ್ಳುತ್ತೇವೆ ಎಂಬುದು ಕೂಡಾ ಒಂದು.
ಬದುಕನ್ನು ನಾವು ನೋಡುವ ರೀತಿ, ಬದುಕಿನ ಬಗೆಗಿನ ನಮ್ಮ ಬಯಕೆ, ಜೀವನವನ್ನು ಅನುಭವಿಸುವ ರೀತಿ, ಜೀವನದಲ್ಲಿನಾವು ಯಾವ ಮಟ್ಟಕ್ಕೇರಬೇಕೆಂದು ಬಯಸುವುದು, ಬದುಕನ್ನು ಹೇಗೆ ತೆಗೆದುಕೊಳ್ಳುತ್ತೇವೆ, ಅಂದರೆ ಸೀರಿಯಸ್ ಆಗಿಯೋ ಅಥವಾ ಪ್ರಾಮಾಣಿಕವಾಗಿಯೇ ಹೀಗೆ ಬದುಕಿನ ಬಗ್ಗೆಯೇ ಹಲವು ಪ್ರಶ್ನೆಗಳು ನಮ್ಮ ನಡವಳಿಕೆಯಲ್ಲಿದೆ. ನಡವಳಿಕೆ ಅಂದರೆ ನಾವು ನಮ್ಮ ಬಗ್ಗೆಯೇ ಅಥವಾ ಇತರರೊಂದಿಗೆ ನಡೆದುಕೊಳ್ಳುವ ಬಗೆ. ಅದು ನಮ್ಮನ್ನು ರೂಪಿಸುತ್ತದೆ, ನಮ್ಮನ್ನು ಯಾವ ಮಟ್ಟದಲ್ಲಿಡಬೇಕು ಎಂಬುದನ್ನು ಸೂಚಿಸುತ್ತದೆ.
ಆಲೋಚನೆಗಳಷ್ಟೇ ಸಕಾರಾತ್ಮಕವಾಗಿ ಇದ್ದರೆ ಸಾಲದು, ಅದಕ್ಕೆ ಪೂರಕವಾಗಿ ನಾವು ಮಾಡುವ ಕಾರ್ಯಗಳೂ ಸಕಾರಾತ್ಮಕವಾಗಿರಬೇಕು. ನಮ್ಮ ಒಳಿತು ಅಥವಾ ಕೆಡುಕೆಂಬ ಕರ್ಮದಿಂದಲೇ ನಮ್ಮ ಸ್ಥಾನಮಾನ ನಿರ್ಧರಿತವಾಗುತ್ತದೆ.
ನಮ್ಮ ನಡೆವಳಿಕೆ ಎಂಬುದು ಲೆನ್ಸ್ ಇದ್ದ ಹಾಗೆ. ಆ ಮೂಲಕ ನಾವು ಜಗತ್ತನ್ನು ಯಾವ ರೀತಿ ಕಾಣುತ್ತೇವೆ, ನಮ್ಮನ್ನು, ನಮ್ಮ ಸುತ್ತಮುತ್ತಲಿನವರನ್ನು ಯಾವ ರೀತಿ ನೋಡುತ್ತೇವೆ ಎಂಬುದನ್ನು ತೋರಿಸುತ್ತದೆ. ನಡೆವಳಿಕೆ ಸಕಾರಾತ್ಮಕವಾಗಿರಲಿ ಅಥವಾ ನಕಾರಾತ್ಮಕವಾಗಿರಲಿ, ಅದು ನಮ್ಮ ಜೀವನದ ಗುಣಮಟ್ಟವನ್ನು ಹೇಳುತ್ತದೆ.
ನಡವಳಿಕೆಯೇ ಎಲ್ಲ
ಜೀವನದಲ್ಲಿ ನಮ್ಮ ನಡವಳಿಕೆಯೇ ಎಲ್ಲ. ಯಾಕಂದರೆ ಜೀವನದಲ್ಲಿ ಅಸಾಧ್ಯವಾದುದು ಯಾವುದೂ ಇಲ್ಲಎಂಬುದು ನಮ್ಮ ಮನಸ್ಥಿತಿಯಾದರೆ, ನಮ್ಮ ಮನಸ್ಸು ಅಸಾಧಾರಣವಾದ ಶಕ್ತಿಯನ್ನು ಬಿಡುಗಡೆ ಮಾಡುತ್ತದೆ. ದೇಹ, ಮನಸ್ಸಿನಲ್ಲೊಂದು ಚೈತನ್ಯ ಮೂಡಿಸುತ್ತದೆ. ಆಗ ಬದುಕಲ್ಲಿ ಬಯಸಿದ್ದನ್ನು ಸಾಧಿಧಿಸುವುದು ಸುಲಭ. ಸರಿಯಾದ ನಡವಳಿಕೆಯನ್ನು ಹೊಂದುವುದು ಅಷ್ಟೊಂದು ಕಷ್ಟವೇನಲ್ಲ. ಸರಿಯಾದ ಜೀವನ ನಡವಳಿಕೆಯನ್ನು ಹೊಂದುವುದಕ್ಕಾಗಿಯೇ ಅದೆಷ್ಟೋ ವರ್ಷಗಳು ಬೇಕಾಗಬಹುದು. ಯಾಕೆಂದರೆ ಅದಕ್ಕೆ ವೈಯಕ್ತಿಕ ಅಥವಾ ಮಾನಸಿಕ ಕಾರಣಗಳೂ ಇರಬಹುದು. ಯಾವುದೋ ಒಂದು ಕೆಲಸದಲ್ಲಿ ಕಂಡ ಸೋಲು, ಇತರರು ನಮ್ಮ ಕಷ್ಟಗಳಿಗೆ ಸ್ಪಂದಿಸುವ ರೀತಿ, ನಮ್ಮ ಸಾಧನೆಯನ್ನು ಕಂಡು ಕರುಬುವ ಮಂದಿ ಅಂದರೆ ಇತರರ ಹಾವಭಾವ, ವ್ಯಕ್ತಿತ್ವವೂ ಕೆಲವೊಮ್ಮೆ ನಮ್ಮ ನಡವಳಿಕೆಯ ಮೇಲೆ ಪರಿಣಾಮ ಬಹಳಷ್ಟು ಬೀರಬಹುದು.
ಸಕಾರತ್ಮಕ ನಡೆವಳಿಕೆಯಿಂದ ಸಕಾರಾತ್ಮಕ ಫಲಿತಾಂಶ ಹೊಂದಬಹುದು. ಅದು ನಮ್ಮ ಪ್ರತಿಯೊಂದು ಅಂಶದ ಮೇಲೂ ಪರಿಣಾಮ ಬೀರುತ್ತದೆ. ಜೀವನವನ್ನೇ ಬದಲಿಸುವಂತಹ ಶಕ್ತಿಯನ್ನು ಹೊಂದಿದೆ. ಅದರಿಂದ ಯಶಸ್ಸು, ಸಂತೋಷ ಲಭಿಸುತ್ತದೆ. ಹಾರ್ವರ್ಡ್ ವಿವಿ ನಡೆಸಿದ ಸಂಶೋಧನೆಯೊಂದರ ಪ್ರಕಾರ ಶೇ.85ರಷ್ಟು ಮಂದಿ ಉದ್ಯೋಗ ಗಳಿಸಿಕೊಳ್ಳುವುದು ತಮ್ಮ ನಡೆವಳಿಕೆಯಿಂದಲೇ ಮತ್ತು ಇನ್ನುಳಿದ ಶೇ.15ರಷ್ಟು ಮಂದಿ ತಮ್ಮ ಸ್ಮಾರ್ಟ್ನೆಸ್ನಿಂದ ಎಂಬುದನ್ನು ಕಂಡುಕೊಂಡಿದೆ.
ನಕಾರಾತ್ಮಕ ಚಿಂತನೆ ನಮ್ಮನ್ನು ಘಾಸಿಗೊಳಿಸುವುದು, ಶಕ್ತಿಹೀನನನ್ನಾಗಿ ಮಾಡುವುದು, ನಿರ್ಧಾರ ತೆಗೆದುಕೊಳ್ಳುವಲ್ಲಿ ವಿಫಲರನ್ನಾಗಿ ಮಾಡುವುದು. ಮಾತ್ರವಲ್ಲ, ಜೀವನದಲ್ಲಿ, ಉದ್ಯೋಗಕ್ಷೇತ್ರದಲ್ಲಿ, ಸಂಬಂಧ, ಖುಷಿಯ ವಿಚಾರಗಳಿಗೂ ಹಾನಿಯನ್ನುಂಟು ಮಾಡುವುದು.
ಕೃತಜ್ಞತೆಯ ಭಾವ ಹೊಂದುವುದು ಬದುಕಿಗೆ ವರ ಇದ್ದ ಹಾಗೆ. ಉಪಕಾರ ಸ್ಮರಣೆ ನಮ್ಮನ್ನು ಖುಷಿಯಾಗಿರುವಂತೆ ಮಾಡುವುದು, ಆರೋಗ್ಯವನ್ನು ಉತ್ತಮಗೊಳಿಸುವುದು, ನಾವು ಹಾಕಿಕೊಂಡ ಯೋಜನೆಗಳಿಗೆ ಯಶಸ್ಸು ಸಿಗುವಂತೆ ಮಾಡುವುದು. ಅಂದರೆ ನಮಗೆ ಸಿಗುವ ಹಾರೈಕೆಗಳು ನಮ್ಮನ್ನು ಸಕಾರಾತ್ಮಕ ಆಲೋಚನೆಗಳಿಗೆ ಎಡೆ ಮಾಡಿಕೊಡುವುದು, ಸಾಧನೆಯೆಡೆಗೆ ಪ್ರೇರೇಪಿಸುವುದು.
ನಮ್ಮ ಹಾವಭಾವ, ವ್ಯಕ್ತಿತ್ವವನ್ನು ಬದಲಾಯಿಸಿಕೊಳ್ಳಲು ಪ್ರೇರಣೆ ನೀಡುವಂತಹ ವ್ಯಕ್ತಿಗಳ ಪುಸ್ತಕಗಳನ್ನು ಓದುವುದು ನಮ್ಮಲ್ಲಿ ಆತ್ಮವಿಶ್ವಾಸವನ್ನು ಮೂಡಿಸುತ್ತದೆ. ಸ್ಪರ್ಧಾತ್ಮಕ ಮನೋಭಾವವನ್ನು ಬೆಳೆಸುತ್ತದೆ. ಯಶಸ್ಸಿಗೆ ಮಾರ್ಗದರ್ಶನ ನೀಡುವುದು. ಯಶಸ್ವೀ ವ್ಯಕ್ತಿಯ ವ್ಯಕ್ತಿತ್ವವನ್ನು ಅಳವಡಿಸಿಕೊಳ್ಳುವುದರಿಂದ ಔನ್ನತ್ಯಕ್ಕೇರಲು ಸಹಕಾರಿಯಾಗುವುದು.
ಜೀವನದಲ್ಲಿಹಾಸ್ಯವೂ ಇರಬೇಕು. ಅದು ಕೂಡಾ ಜೀವನದ ಒಂದು ಭಾಗ. ಹಾಸ್ಯಪ್ರವೃತ್ತಿ ಒತ್ತಡವನ್ನು ಕಳೆದು ನಿರಾಳವೆನಿಸುವಂತೆ ಮಾಡುವುದು. ನಿತ್ಯದ ಸಂವಹನದಲ್ಲಿ ಹಾಸ್ಯಗಳು ಬೆರೆತಾಗ ಬದುಕು ಸರಳ ಎನ್ನಿಸುವುದು.
