ಟಿಬಿ ಕಾಯಿಲೆ ಇರುವವರು ಈ ಯೋಗಾಸನ ದಿನಾ ತಪ್ಪದೇ ಮಾಡಿ

ವಿಶ್ವ ಆರೋಗ್ಯ ಸಂಸ್ಥೆ ಹೇಳುವ ಪ್ರಕಾರ ಈ ಟಿಬಿ ಕಾಯಿಲೆ ಸುಲಭವಾಗಿ, ಒಬ್ಬರಿಂದ ಒಬ್ಬರಿಗೆ ಹರಡುವ ಖತರ್ನಾಕ್ ಕಾಯಿಲೆ ಆಗಿದ್ದು, ಮನುಷ್ಯನ ಶ್ವಾಸಕೋಶಕ್ಕೆ ದಾಳಿ ಮಾಡುವ ಎಲ್ಲಾ ಗುಣಲಕ್ಷಣಗಳನ್ನು ಹೊಂದಿದೆಯಂತೆ! ಹೀಗಾಗಿ ಈ ಕಾಯಿಲೆಯನ್ನು ಆರಂಭದಲ್ಲಿಯೇ ಪತ್ತೆ ಹಚ್ಚಿ ಕೂಡಲೇ ಚಿಕಿತ್ಸೆಯನ್ನು ಶುರು ಮಾಡಿದರೆ ಮಾತ್ರ, ಆರೋಗ್ಯಕಾರಿ ಜೀವನ ನಡೆಸಲು ಸಾಧ್ಯವಾಗುತ್ತದೆ.

ಈ ಕಾಯಿಲೆ ಒಬ್ಬರಿಂದ ಒಬ್ಬರಿಗೆ ಹೇಗೆ ಹರಡುತ್ತದೆ ಎಂದ್ರೆ ಸೊಂಕು ಇರುವ ಒಬ್ಬ ವ್ಯಕ್ತಿ ಕೆಮ್ಮಿದಾಗ ಅಥವಾ ಸೀನಿದಾಗ ಸಣ್ಣ ಸಣ್ಣ ನೀರಿನ ಕಣಗಳ ಮೂಲಕ ಬೇರೆಯವರಿಗೆ ವರ್ಗಾವಣೆ ಯಾಗುತ್ತವೆ. ಅದರಲ್ಲೂ ಪ್ರಮುಖವಾಗಿ ಶ್ವಾಸಕೋಶ ವ್ಯವಸ್ಥೆಯ ಮೇಲೆ ದಾಳಿ ಮಾಡುವ ಈ ಕಾಯಿಲೆಯು, ವ್ಯಕ್ತಿಯ ಆರೋಗ್ಯದಲ್ಲಿ ಅನೇಕ ರೀತಿಯ ಸಮಸ್ಯೆಗಳನ್ನು ತಂದೊಡ್ಡುತ್ತದೆ.

ಈ ಟಿಬಿ ಕಾಯಿಲೆಯ ಲಕ್ಷಣಗಳು

ಈ ಕಾಯಿಲೆಯ ಲಕ್ಷಣಗಳನ್ನು ನೋಡುವುದಾದರೆ, ಕೆಲವರಿಗೆ ಅತಿಯಾಗಿ ಕಾಡುವ ಉಸಿರಾಟದ ಸಮಸ್ಯೆ, ಇಲ್ಲಾಂದ್ರೆ ಕೆಮ್ಮಿದಾಗ ರಕ್ತ ಕಂಡು ಬರುವುದು, ಸಡನ್ ಆಗಿ ಎದೆಯಲ್ಲಿ ನೋವು ಕಂಡು ಬರುವುದು, ದೇಹದ ತೂಕ ಕಡಿಮೆ ಆಗಿ ಬಿಡುವುದು, ಆಯಾಸ, ಜ್ವರ, ರಾತ್ರಿಯ ಸಮಯದಲ್ಲಿ ಮೈ ಬೆವರುವುದು ಮತ್ತು ನಡುಗುವುದು ಹೊಟ್ಟೆ ಹಸಿವು ಇಲ್ಲದಂತಾಗುವುದು ಇತ್ಯಾದಿ ಸಮಸ್ಯೆಗಳು ಕಂಡು ಬರುತ್ತವೆ.

ಇದನ್ನು ನಿಯಂತ್ರಿಸುವುದು ಹೇಗೆ?

• ನಿಮಗೆಲ್ಲ ಗೊತ್ತಿರುವ ಹಾಗೆ ಯಾವುದೇ ಕಾಯಿಲೆಯನ್ನು ಹೋಗಲಾಡಿಸಲು ನಾವು ವೈದ್ಯರು ಕೊಡುವ ಔಷಧಿಗಳನ್ನು ತೆಗೆದುಕೊಳ್ಳುವುದರ ಜೊತೆಗೆ ನಮ್ಮ ಜೀವನ ಶೈಲಿಯನ್ನು ಅತ್ಯುತ್ತಮವಾಗಿ ಕಾಪಾಡಿಕೊಳ್ಳಬೇಕು. ಇದರಲ್ಲಿ ಹೆಚ್ಚು ಸಹಾಯಕ ಎಂದರೆ ನಾವು ಯೋಗ ಮಾಡುವ ಅಭ್ಯಾಸವನ್ನು ರೂಢಿ ಮಾಡಿಕೊಳ್ಳುವುದು.

• ಅತ್ಯಂತ ಪರಿಣಾಮಕಾರಿಯಾಗಿ ಈ ಕೆಳಗೆ ತಿಳಿಸಿರುವ ಯೋಗಾಭ್ಯಾಸಗಳನ್ನು ಟ್ರೈ ಮಾಡುವುದರಿಂದ ನಮ್ಮ ಎದೆಯ ಭಾಗದಲ್ಲಿ ಉಸಿರು ಕಟ್ಟಿಕೊಂಡಿರುವ ಹಾಗೆ ಉಂಟಾಗುವ ಅನುಭವ ದೂರ ವಾಗುತ್ತದೆ. ಹಾಗಾಗಿ ಈ ಸಮಸ್ಯೆಯನ್ನು ಬುಡದಿಂದಲೇ ಕಿತ್ತು ಹಾಕಲು, ವೈದ್ಯರು ಕೊಟ್ಟಿರುವ ಔಷಧಿಗಳನ್ನು ತೆಗೆದುಕೊಳ್ಳುವುದರ, ಜೊತೆಗೆ ಸರಿಯಾದ ಆಹಾರಪದ್ಧತಿಗಳನ್ನು ಹಾಗೂ ನಮ್ಮ ಜೀವನ ಶೈಲಿಯನ್ನು ಅತ್ಯುತ್ತಮವಾಗಿ ಕಾಪಾಡಿಕೊಳ್ಳಬೇಕು.

• ಅದರಲ್ಲೂ ವಿಶೇಷವಾಗಿ ಕೆಲವೊಂದು ಯೋಗಾಸನಗಳನ್ನು ಮಾಡುವ ಅಭ್ಯಾಸವನ್ನು ಪ್ರತಿನಿತ್ಯ ಮಾಡುವ ಅಭ್ಯಾಸವನ್ನು ರೂಢಿ ಮಾಡಿಕೊಳ್ಳಬೇಕು. ಬನ್ನಿ ಇಂದಿನ ಲೇಖನದಲ್ಲಿ ತಿಳಿಸಿರುವ ಅತ್ಯಂತ ಪರಿಣಾಮಕಾರಿ ಯೋಗಾಭ್ಯಾಸಗಳನ್ನು ಟ್ರೈ ಮಾಡುವುದರಿಂದ ನಮ್ಮ ದೇಹದ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಿ, ಟಿಬಿ ಕಾಯಿಲೆಯ ವಿರುದ್ಧ ಹೋರಾಡುವಂತಹ ಶಕ್ತಿಯನ್ನು ಆಂತರಿಕವಾಗಿ ನಮಗೆ ಕೊಡುತ್ತದೆ.

ಕಪಾಲಭಟಿ ಪ್ರಾಣಯಾಮ

• ಈ ಯೋಗಾಭ್ಯಾಸವನ್ನು ದಿನಾ ಮಾಡುವುದರಿಂದ, ಶ್ವಾಸಕೋಶದಲ್ಲಿ ಕಂಡುಬರುವ ವಿಷಕಾರಿ ಅಂಶಗಳು ದೂರವಾಗುತ್ತವೆ. ಅದರಲ್ಲೂ ಯಾರಿಗೆ ಹೆಚ್ಚಾಗಿ ಕಫ ಸಮಸ್ಯೆ ಇರುತ್ತದೆಯೋ, ಅಂತಹವರಿಗೆ ಈ ಯೋಗಾಭ್ಯಾಸ ತುಂಬಾ ಪ್ರಬಲವಾಗಿ ಕೆಲಸ ಮಾಡಬಲ್ಲದು.

• ಮೊದಲು ನೆಲದ ಮೇಲೆ, ಮ್ಯಾಟ್ ಹಾಸಿಕೊಂಡು ಸುಖಾಸನದಲ್ಲಿ ಕುಳಿತುಕೊಳ್ಳಿ. ಈ ಸಮಯದಲ್ಲಿ ನಿಮ್ಮ ಎರಡು ಅಂಗೈಗಳು, ನಿಮ್ಮ ಮಂಡಿ ಮೇಲೆ ಇರಲಿ. ಆದರೆ ಅಂಗೈಗಳನ್ನು ಮೇಲೆ ನೋಡುವಂತೆ ಇಟ್ಟುಕೊಳ್ಳಿ.

• ಇನ್ನು ದೀರ್ಘವಾಗಿ ಉಸಿರನ್ನು ಒಳಗೆ ತೆಗೆದುಕೊಂಡು ಹೊರಗೆ ಬಿಡುವಾಗ ಮೂಗಿನ ಮೂಲಕ ಉಸಿರನ್ನು ಹೊರ ಬಿಟ್ಟು ಹೊಟ್ಟೆಯನ್ನು ಒಳಗೆಳೆದುಕೊಳ್ಳಿ.

• ಈಗ ನಿಧಾನವಾಗಿ ಉಸಿರನ್ನು ಒಳಗೆ ತೆಗೆದುಕೊಂಡು ಹೊಟ್ಟೆಯ ಭಾಗದ ಮಾಂಸಖಂಡಗಳನ್ನು ಸಡಿಲವಾಗಿ ಇಟ್ಟುಕೊಳ್ಳಿ. ನಿಧಾನವಾಗಿ ನಿಮ್ಮ ಹೊಟ್ಟೆಯ ಭಾಗದ ಮಾಂಸಖಂಡಗಳನ್ನು ಒಳಗೆ ತೆಗೆದುಕೊಂಡು ನಂತರ ಹೊರಬಿಡಿ.

• ಸುಮಾರು ಹತ್ತು ಇಪ್ಪತ್ತು ಬಾರಿ ಇದೇ ರೀತಿ ಮಾಡಿ ನಿಮಗೆ ಆರಾಮದಾಯಕ ಎನಿಸಿದ ತಕ್ಷಣ ನಿಮ್ಮ ಅಭ್ಯಾಸವನ್ನು ಮತ್ತಷ್ಟು ಬಾರಿ ಮುಂದುವರೆಸಬಹುದು.

• ಪ್ರತಿದಿನ ಬೆಳಗಿನ ಜಾವ ಮತ್ತು ಸಂಜೆಯ ಸಮಯದಲ್ಲಿ ಈ ಯೋಗಾಭ್ಯಾಸವನ್ನು ಮುಂದುವರಿಸಬಹುದು.

ತ್ರಿಕೋನಾಸನ

• ಈ ಯೋಗಾಸನ ಮಾಡಲು ನೇರವಾಗಿ ನಿಂತುಕೊಂಡು ಕಾಲುಗಳನ್ನು ಸ್ವಲ್ಪ ಅಗಲವಾಗಿ ಇಟ್ಟುಕೊಳ್ಳಬೇಕು ಮತ್ತು ಮತ್ತು ಕೈಗಳು ನೆಲಕ್ಕೆ ಸಮಾನಾಂತರವಾಗಿರಬೇಕು.

• ಇನ್ನು ಎರಡೂ ಕೈಗಳನ್ನು ನೇರವಾಗಿ ನಿಮ್ಮ ಭುಜದ ಭಾಗಕ್ಕೆ ತಂದುಕೊಳ್ಳಿ

• ಇಷ್ಟಾದ ಬಳಿಕ ದೀರ್ಘವಾದ ಉಸಿರನ್ನು ಒಳಗೆ ತೆಗೆದುಕೊಂಡು, ಎಡಗೈ ಸ್ವಲ್ಪ ಮೇಲೆತ್ತಿ

• ಆಮೇಲೆ, ಬಲಭಾಗಕ್ಕೆ ಸ್ವಲ್ಪ ಬಾಗಿ ನಿಮ್ಮ ಬಲಗೈಯನ್ನು ಕೆಳಗಡೆಗೆ ತಂದುಕೊಳ್ಳಿ

• ಈ ಸಮಯದಲ್ಲಿ ನೀವು ನಿಮ್ಮ ಮನೆಯ ಛಾವಣಿ ಕಡೆಗೆ ನೋಡುತ್ತಿರಬೇಕು ಮತ್ತು ದೀರ್ಘವಾಗಿ ಉಸಿರಾಟ ನಡೆಸಬೇಕು.

• ನಿಮ್ಮ ಒಳ ತೆಗೆದುಕೊಂಡ ಉಸಿರನ್ನು ಹೊರಗೆ ಬಿಡುತ್ತಾ ವಿಶ್ರಾಂತ ಸ್ಥಿತಿಗೆ ಮರಳಿ ಬನ್ನಿ

• ಇದೇ ಭಂಗಿಯಲ್ಲಿ ಸುಮಾರು ಒಂದು ನಿಮಿಷ ಇದ್ದು ಮತ್ತೆ ಸಹಜ ಸ್ಥಿತಿಗೆ ಮರಳಿ.

ಭುಜಂಗಾಸನ

• ಮೊದಲು ಭುಜದ ಕೆಳಭಾಗದಲ್ಲಿ ನಿಮ್ಮ ಎರಡು ಅಂಗೈಗಳನ್ನು ಇಟ್ಟುಕೊಂಡು, ಹೊಟ್ಟೆಯನ್ನು ಕೆಳಗೆ ಮಾಡಿಕೊಂಡು ನೆಲದಮೇಲೆ ಮಲಗಿಕೊಳ್ಳಬೇಕು.

• ಇನ್ನು ನಿಮ್ಮ ಎರಡು ಪಾದಗಳನ್ನು ಒಟ್ಟಿಗೆ ಇಟ್ಟುಕೊಂಡು, ನೆಲದ ಮೇಲೆ ನಿಮ್ಮ ಕಾಲುಗಳ ಹೆಬ್ಬೆರಳು ಬರುವಂತೆ ನೋಡಿಕೊಳ್ಳಿ.

• ಈ ಸಮಯದಲ್ಲಿ ದೀರ್ಘವಾದ ಉಸಿರನ್ನು ಒಳಗೆ ತೆಗೆದುಕೊಂಡು, ಹಾಗೆ ಬಿಗಿ ಹಿಡಿದುಕೊಂಡು ನಿಮ್ಮ ಕುತ್ತಿಗೆ ಹಾಗೂ ಭುಜದ ಭಾಗವನ್ನು 30 ಡಿಗ್ರಿ ಕೋನ್ ಆಕಾರದಲ್ಲಿ ಮೇಲೆತ್ತಲು ಪ್ರಯತ್ನಿಸಿ.

• ಈ ಸಂದರ್ಭದಲ್ಲಿ ನಿಮ್ಮ ಹೊಕ್ಕಳಿನ ಭಾಗ ನೆಲದ ಮೇಲೆ ಇರಬೇಕು, ನಿಮ್ಮ ಭುಜ ಅಗಲವಾಗಿರಬೇಕು ಮತ್ತು ನಿಮ್ಮ ತಲೆಯ ಭಾಗ ಮೇಲಕ್ಕೆತ್ತಿರಬೇಕು.

• ನಿಮ್ಮ ಕಾಲಿನ ಹೆಬ್ಬೆರಳುಗಳ ಮೇಲೆ ಒತ್ತಡವನ್ನು ಹಾಕಿ ನಿಮ್ಮ ದೇಹದ ಎರಡು ಕಡೆ ಶಕ್ತಿ ಸಂಚಲನ ಆಗುವಂತೆ ಮಾಡಿ.

• ಇದೇ ರೀತಿ ಹತ್ತು ಸೆಕೆಂಡುಗಳ ಕಾಲ ಹಾಗೆ ಇದ್ದು, ನಂತರ ನಿಮ್ಮ ದೇಹವನ್ನು ನೆಲದ ಕಡೆಗೆ ತಂದು, ತೆಗೆದುಕೊಂಡ ಉಸಿರನ್ನು ಹೊರಗೆ ಬಿಡಿ.