ಕೋವಿಡ್ – 19 ಎಂದರೆ ಪ್ರತಿಯೊಬ್ಬರು ಒಂದು ಕ್ಷಣ ತಮ್ಮ ಉಸಿರನ್ನು ಬಿಗಿ ಹಿಡಿದುಕೊಳ್ಳುತ್ತಾರೆ. ಏಕೆಂದರೆ ಎಲ್ಲಿಗೆ ಕಾಯಿಲೆ ಉಂಟು ಮಾಡುವ ವೈರಾಣು ತಮ್ಮ ಶ್ವಾಸಕೋಶದ ಮೇಲೆ ದಾಳಿ ಮಾಡಿ ತಮ್ಮ ಉಸಿರಾಟವನ್ನೇ ನಿಲ್ಲಿಸಿ ಬಿಡುತ್ತದೆಯೋ ಎಂಬ ಭಯದಿಂದ. ಬಂದು ಈಗಾಗಲೇ ಬರೋಬ್ಬರಿ ಎರಡು ವರ್ಷ ಕಳೆದರೂ ಸರಿಯಾದ ಚಿಕಿತ್ಸೆ ಇದಕ್ಕೆ ಲಭ್ಯವಿಲ್ಲ. ಹೇಳುವವರು ಕೇಳುವವರು ಯಾರು ಇಲ್ಲ ಎಂಬಂತೆ ಜಗತ್ತಿನಲ್ಲಿ ತನ್ನ ಅಟ್ಟಹಾಸವನ್ನು ಬೇಕಾದಾಗ ಹೆಚ್ಚಿಸುತ್ತದೆ ಬೇಡವಾದಾಗ ಕಡಿಮೆ ಮಾಡುತ್ತದೆ. ಈ ಮಧ್ಯದಲ್ಲಿ ಹಲವಾರು ಜನರ ಜೀವವನ್ನು ಹಾರಿಸಿಕೊಂಡು ಹೋಗುತ್ತದೆ.
ಜನರು ಗೊತ್ತಿಲ್ಲದೆ ತಮ್ಮ ಜೀವನ ಶೈಲಿಯನ್ನು ಅನಾರೋಗ್ಯಕರ ಭಾವದಿಂದ ಅನುಸರಿಸುತ್ತಿದ್ದಾರೆ. ಇದರಿಂದ ದಿನೇ ದಿನೇ ತಮ್ಮ ರೋಗ – ನಿರೋಧಕ ಶಕ್ತಿಯ ಕೊರತೆ ಕಾಣುತ್ತಿದ್ದಾರೆ. ಬರುವ ಸಣ್ಣ – ಪುಟ್ಟ ಆರೋಗ್ಯ ಸಮಸ್ಯೆಗಳಿಗೂ ಮೆಡಿಕಲ್ ಶಾಪ್ ಅಥವಾ ಆಸ್ಪತ್ರೆಯ ಬಾಗಿಲು ತಟ್ಟುತ್ತಿದ್ದಾರೆ. ತಮ್ಮಿಂದ ತಮ್ಮ ಆರೋಗ್ಯದ ವಿಚಾರದಲ್ಲಿ ಹೇಗೆ ತಪ್ಪು ನಡೆಯುತ್ತಿದೆ ಎಂಬ ಅರಿವು ಕೂಡ ಜನರಿಗೆ ಇಲ್ಲ ಎನಿಸುತ್ತದೆ.
ಯೋಗಾಭ್ಯಾಸ ಪದ್ಧತಿ
ಇತ್ತೀಚಿನ ಪೀಳಿಗೆಗೆ ಮಾತ್ರ ಇದೆಲ್ಲ ಒಂದು ರೀತಿಯ ಹೊಸ ಅನುಭವವನ್ನು ಉಂಟು ಮಾಡುತ್ತದೆ. ಆದರೆ ಆಯುರ್ವೇದ ತಜ್ಞರನ್ನು ಕೇಳಿದರೆ ಇದೇನು ಹೊಸದಾಗಿ ಬಂದಿರುವ ಕಾಯಿಲೆಯಲ್ಲ. ಈ ಹಿಂದೆಯೂ ಇದರಂತೆ ಸಾಕಷ್ಟು ಮಾರಕ ಕಾಯಿಲೆಗಳು ಬಂದು ಹೋಗಿವೆ. ಈಗಿನ ಆಂಗ್ಲ ಔಷಧಿಯಲ್ಲಿ ಬಗೆಹರಿಯದ ಸಮಸ್ಯೆಯನ್ನು ನಮ್ಮ ಸಾಂಪ್ರದಾಯಿಕ ಔಷಧೀಯ ಪದ್ಧತಿ ಹಾಗೂ ಯೋಗಾಭ್ಯಾಸ ಪದ್ಧತಿ ಪರಿಹರಿಸುತ್ತದೆ ಎಂದು ಹೇಳುತ್ತಾರೆ. ಇಂತಹ ಒಂದು ಪರಿಹಾರ ಪ್ರಾಣಾಯಾಮ ಯೋಗಾಭ್ಯಾಸ ಮಾಡುವುದರಿಂದ ಸಿಗುತ್ತದೆ ಎನ್ನುವುದು ಹಲವರ ನಂಬಿಕೆ.
ಯೋಗಾಭ್ಯಾಸ ಪದ್ಧತಿಗೆ ಹಲವಾರು ವರ್ಷಗಳ ಇತಿಹಾಸವಿದೆ. ನಮಗಿಂತ ಹಿಂದಿನ ಜನರು ದೀರ್ಘಾಯುಷಿಗಳಾಗಿ ಯಾವುದೇ ಕಾಯಿಲೆಗಳು ಇಲ್ಲದೆ ಅತ್ಯಂತ ಆರೋಗ್ಯಕರವಾಗಿ ಇತರರಿಗೆ ಮಾದರಿಯಾಗಿ ಬಾಳಿ ಬದುಕಿದ ದಿನಗಳಿಗೆ ಯೋಗಾಭ್ಯಾಸ ಕೂಡ ಒಂದು ಸಾಕ್ಷಿ ಎಂದು ಹೇಳಬಹುದು. ಆರಂಭದಲ್ಲಿ ಕಷ್ಟ ಎನಿಸಿದರೂ ಕೂಡ ಆನಂತರದಲ್ಲಿ ಬಹಳಷ್ಟು ಸುಲಭವಾಗಿ ಯೋಗಾಭ್ಯಾಸದ ವಿವಿಧ ಭಂಗಿಗಳನ್ನು ಅನುಸರಿಸಬಹುದು. ವ್ಯಾಯಾಮದಂತೆ ಯೋಗ ಮಾಡಲು ಯಾವುದೇ ಉಪಕರಣಗಳ ಅವಶ್ಯಕತೆ ಇಲ್ಲ. ಹಾಗಾಗಿ ಯಾರು ಬೇಕಾದರೂ ಯಾವುದೇ ವಯಸ್ಸಿನಲ್ಲಿ ಯೋಗ ಮಾಡುವ ಅಭ್ಯಾಸವನ್ನು ರೂಡಿ ಮಾಡಿಕೊಳ್ಳಬಹುದು.
ಭ್ರಮರಿ ಪ್ರಾಣಾಯಾಮ
ಪ್ರತಿಯೊಂದು ಆರೋಗ್ಯ ಸಮಸ್ಯೆಗಳಿಗೆ ಹಾಗೂ ದೇಹದ ಅಂಗಾಂಗಗಳಿಗೆ ಸಂಬಂಧ ಪಟ್ಟಂತೆ ಉಂಟಾಗುವ ತೊಂದರೆಗಳ ಪರಿಹಾರಕ್ಕೆ ಯೋಗಾಭ್ಯಾಸದಲ್ಲಿ ಉತ್ತರವಿದೆ. ಅದರಂತೆ ಉಸಿರಾಟ ವ್ಯವಸ್ಥೆಯನ್ನು ಸರಿ ಪಡಿಸಿಕೊಳ್ಳುವ ವಿಚಾರದಲ್ಲೂ ಯೋಗಾಭ್ಯಾಸದ ಹಲವಾರು ಭಂಗಿಗಳನ್ನು ನಾವು ನೋಡಬಹುದು.
ಈಗಾಗಲೇ ಕೊರೋನಾ ಸೋಂಕು ಹೊಂದಿರುವ ಜನರಿಗೆ ಈಗಾಗಲೇ ತಮ್ಮ ದೇಹದ ಶ್ವಾಸಕೋಶ ಮತ್ತು ಉಸಿರಾಟ ವ್ಯವಸ್ಥೆ ಎಷ್ಟು ಮುಖ್ಯ ಎಂಬುದು ಅರ್ಥ ಆಗಿರುತ್ತದೆ. ಹಾಗಾಗಿ ಇನ್ನು ಮುಂದೆ ಶ್ವಾಸಕೋಶದ ವಿಚಾರದಲ್ಲಿ ಹಿಂದೆಂದಿಗಿಂತ ಅತಿ ಹೆಚ್ಚಿನ ಜಾಗರೂಕತೆ ವಹಿಸಬೇಕು. ಇದಕ್ಕೆ ಸಂಬಂಧ ಪಟ್ಟಂತೆ ಇರುವ ಪ್ರಕ್ರಿಯೆಗಳನ್ನು ಅನುಸರಿಸಬೇಕು. ಯೋಗಾಭ್ಯಾಸದಲ್ಲಿ ಭ್ರಮರಿ ಪ್ರಾಣಾಯಾಮ ಮಾಡುವ ಮೂಲಕ ಅಚ್ಚುಕಟ್ಟಾದ ಉಸಿರಾಟ ವ್ಯವಸ್ಥೆಯನ್ನು ಹೊಂದಬಹುದು ಎಂದು ದೈಹಿಕ ಸ್ವಾಸ್ಥ್ಯ ತಜ್ಞರು ಹೇಳುತ್ತಾರೆ.
ಶ್ವಾಸಕೋಶಕ್ಕೆ ಸಿಗುವ ಆರೋಗ್ಯ ಪ್ರಯೋಜನ
ಈ ಲೇಖನದಲ್ಲಿ ಉಸಿರಾಟ ವ್ಯವಸ್ಥೆಯನ್ನು ವೃದ್ಧಿಸುವ ಭ್ರಮರಿ ಪ್ರಾಣಾಯಾಮ ಯೋಗಾಭ್ಯಾಸ ಮಾಡುವುದರಿಂದ ಶ್ವಾಸಕೋಶಕ್ಕೆ ಸಿಗುವ ಆರೋಗ್ಯ ಪ್ರಯೋಜನಗಳನ್ನು ತಿಳಿದುಕೊಳ್ಳಬಹುದು
ಶ್ವಾಸಕೋಶದ ಆರೋಗ್ಯದಲ್ಲಿ ಹಾಗೂ ಉಸಿರಾಟ ವ್ಯವಸ್ಥೆಯಲ್ಲಿ ಪ್ರಾಣಾಯಾಮ ಯೋಗಾಭ್ಯಾಸ ಹೆಚ್ಚು ಅನುಕೂಲಕ್ಕೆ ಬರಲಿದೆ. ನೈಟ್ರಿಕ್ ಆಕ್ಸೈಡ್ ಅಂಶವನ್ನು ಬಿಡುಗಡೆ ಮಾಡುವ ಮೂಲಕ ಶ್ವಾಸಕೋಶದ ಸೋಂಕನ್ನು ದೂರ ಮಾಡಿ ದೇಹದ ರೋಗ – ನಿರೋಧಕ ಶಕ್ತಿಯನ್ನು ಹೆಚ್ಚು ಮಾಡಿ ಬಹಳ ವೇಗವಾಗಿ ವೈರಸ್ ಸೋಂಕಿನ ಸಂತತಿಯನ್ನು ತಗ್ಗಿಸುತ್ತದೆ. ಕೊರೋನಾ ಸೋಂಕಿತರಿಗೆ ಇದು ಹೆಚ್ಚು ಅನುಕೂಲಕಾರಿ ಎನಿಸುವ ಯೋಗಾಭ್ಯಾಸ ಪದ್ಧತಿ ಎಂದು ಹೇಳುತ್ತಾರೆ. ಸಾಮಾನ್ಯ ಜನರು ಸಹ ಪ್ರತಿ ದಿನ 2 ರಿಂದ 3 ಬಾರಿ ಸುಮಾರು ಹತ್ತು ನಿಮಿಷಗಳ ಕಾಲ ಇದನ್ನು ಅಭ್ಯಾಸ ಮಾಡುವುದು ಒಳ್ಳೆಯದು.
ಪ್ರಾಣಾಯಾಮ ಯೋಗಾಭ್ಯಾಸ ಮಾಡುವ ಸುಲಭ ವಿಧಾನ
ಮೊದಲು ಒಂದು ಯೋಗ ಚಾಪೆಯ ಮೇಲೆ ಆರಾಮವಾಗಿ ಕಾಲು ಮಡಿಸಿಕೊಂಡು ನೇರವಾಗಿ ಕಣ್ಣು ಮುಚ್ಚಿ ಕುಳಿತುಕೊಳ್ಳಬೇಕು.
ಈಗ ನಿಮ್ಮ ಎರಡು ಕೈಗಳನ್ನು ಅಕ್ಕ ಪಕ್ಕದ ಮಂಡಿಗಳ ಮೇಲೆ ಅಂಗೈ ಮೇಲ್ಮುಖವಾಗಿ ಇರುವಂತೆ ಇಟ್ಟುಕೊಳ್ಳಬೇಕು.
ದೀರ್ಘವಾಗಿ ಉಸಿರನ್ನು ಒಳಗೆ ತೆಗೆದುಕೊಂಡು ಉಸಿರನ್ನು ಹೊರ ಬಿಡುವ ಸಂದರ್ಭದಲ್ಲಿ ಓಂಕಾರವನ್ನು ಹೇಳಬೇಕು.
ದಿನಂಪ್ರತಿ ಈ ಅಭ್ಯಾಸವನ್ನು ರೂಡಿ ಮಾಡಿಕೊಳ್ಳುವುದರಿಂದ ಉಸಿರಾಟಕ್ಕೆ ಸಂಬಂಧ ಪಟ್ಟ ಅವ್ಯವಸ್ಥೆಯನ್ನು ದೂರ ಮಾಡಿಕೊಳ್ಳುವುದರ ಜೊತೆಗೆ ಅಸ್ತಮಾ ಹಾಗೂ ದಮ್ಮು ಸಮಸ್ಯೆಯಿಂದ ಕೂಡ ಮುಕ್ತಿ ಕಾಣಬಹುದು.
ಶ್ವಾಸಕೋಶದ ಆರೋಗ್ಯಕ್ಕೆ ಮಾಡಬೇಕಾದ ಮುಖ್ಯವಾದ ಕ್ರಮ
ಮುಖ್ಯವಾಗಿ ಶ್ವಾಸ ಕೋಶಕ್ಕೆ ಸಂಬಂಧ ಪಟ್ಟ ಸಮಸ್ಯೆಯನ್ನು ಅನುಭವಿಸುತ್ತಿರುವ ಜನರು ತಮ್ಮ ಧೂಮಪಾನ ಹಾಗೂ ತಂಬಾಕು ಜಿಗಿಯುವ ಹವ್ಯಾಸವನ್ನು ಕೈ ಬಿಡುವುದು ಒಳ್ಳೆಯದು. ಇದರಿಂದ ಬಹಳ ಬೇಗನೆ ಶ್ವಾಸ ಕೋಶ ಕ್ಯಾನ್ಸರ್ ಬರುವ ಸಾಧ್ಯತೆ ಹೆಚ್ಚಾಗಿರುತ್ತದೆ. ಕೋವಿಡ್ – 19 ವೈರಾಣುಗಳಿಗೆ ಇಂತಹ ವಾತಾವರಣ ಸೋಂಕನ್ನು ಹೆಚ್ಚಿಸಲು ಪೂರಕವಾಗಿ ಅನುಕೂಲ ಮಾಡಿಕೊಟ್ಟಂತೆ ಆಗುತ್ತದೆ. ಹಾಗಾಗಿ ಜನರು ತಮ್ಮ ಆರೋಗ್ಯದ ದೃಷ್ಟಿಯಿಂದ ತಮ್ಮ ದೀರ್ಘ ಕಾಲದ ಇಂತಹ ಕೆಟ್ಟ ಚಟಗಳಿಗೆ ಗುಡ್ ಬೈ ಹೇಳುವುದು ಒಳ್ಳೆಯದು.
