ಟೆನ್ಷನ್‌ ಕಂಟ್ರೋಲ್‌ ಮಾಡಲು ಈ ಯೋಗಾಸನಗಳು ಸಹಕಾರಿ

August 31, 2022

ಸಾಮಾನ್ಯವಾಗಿ ಕೆಲಸದ ಒತ್ತಡ, ಗಡಿಬಿಡಿ, ಮನೆಯ ಜಂಜಾಟ ಇವೆಲ್ಲವುಗಳಿಂದ ಟೆನ್ಷನ್‌ ಆಗುವುದು ಸಹಜ. ಮನಸ್ಸು ಚಿಂತೆಯಿಂದ ಬಗ್ಗಡವಾಗುತ್ತದೆ. ಇದರಿಂದ ಮಾನಸಿಕ ಸ್ಥಿತಿ ಹದಗೆಡುತ್ತದೆ. ಸಣ್ಣ ಸಣ್ಣ ವಿಷಯಕ್ಕೂ ಸಿಟ್ಟು ಬರುತ್ತದೆ. ಅದನ್ನು ನಿಯಂತ್ರಿಸದಿದ್ದರೆ ಮಾನಸಿಕ ಆರೋಗ್ಯದ ಜೊತೆಗೆ ದೈಹಿಕ ಆರೋಗ್ಯವೂ ಹದಗೆಡುತ್ತದೆ. ಈ ರೀತಿ ಟೆನ್ಷನ್‌ ಆಗುವ ಮನಸ್ಸನ್ನು ಕಂಟ್ರೋಲ್‌ ಮಾಡಲು ನಿಯಮಿತ ಯೋಗಾಭ್ಯಾಸಗಳು ಸಹಕಾರಿಯಾಗಿವೆ. ಹಾಗಾದರೆ ಯಾವೆಲ್ಲ ಯೋಗಾಸನಗಳು ಮಾನಸಿಕ ಆರೋಗ್ಯವನ್ನು ಸ್ಥಿತಿಮಿತದಲ್ಲಿಟ್ಟುಕೊಳ್ಳಲು ಸಹಕಾರಿಯಾಗಿವೆ ಎಂಬುದರ ಬಗ್ಗೆ ಇಲ್ಲಿದೆ ಮಾಹಿತಿ.

ಶವಾಸನ

ಆಸನಗಳೆಲ್ಲವನ್ನೂ ಮಾಡಿ ಕೊನೆಯಲ್ಲಿ ಮಾಡುವ ಆಸನ ಶವಾಸನ. ಆದರೆ ನಿಮ್ಮ ಮಾನಸಿಕ ಆರೋಗ್ಯವನ್ನು ಉತ್ತಮವಾಗಿಸಲು ಈ ಶವಾಸನ ಅತ್ಯುತ್ತಮವಾಗಿದೆ. ನಿಮಗೆ ಟೆನ್ಷನ್‌ ಆದರೆ, ಸಿಟ್ಟು ಬಂದರೆ ಒಂದೈದು ನಿಮಿಷ ಶವಾಸನವನ್ನು ಮಾಡಿ.

ಮಾಡುವ ವಿಧಾನ

ಮೊದಲು ನೇರವಾಗಿ ಮಲಗಿಕೊಂಡು ಕಾಲುಗಳನ್ನು ಸಡಿಲಗೊಳಿಸಿ. ನಂತರ ಕೈ, ಭುಜ, ಬೆರಳುಗಳನ್ನು ಆರಾಮದಾಯಕವಾಗಿ ಸಡಿಲಬಿಡಿ. ದೇಹದ ಯಾವುದೇ ಭಾಗದ ಮೇಲೆ ಒತ್ತಡವನ್ನು ಹಾಕಬೇಡಿ. ಕಣ್ಣನ್ನು ನಿಧಾನವಾಗಿ ಮುಚ್ಚಿರಿ. ನಿಮ್ಮ ಉಸಿರಾಟವು ಸ್ವಾಭಾವಿಕವಾಗಿ ನಡೆಯಲಿ. ನಿಮ್ಮ ಮನಸ್ಸು ಅಲೆದಾಡುತ್ತಿದ್ದರೆ, ನಿಮ್ಮ ಗಮನವನ್ನು ನಿಮ್ಮ ಉಸಿರಾಟದ ಕಡೆಗೆ ತನ್ನಿ. ಕನಿಷ್ಠ ಐದು ನಿಮಿಷಗಳ ಕಾಲ ಇರಿ. ಹತ್ತು ನಿಮಿಷಗಳು ಉತ್ತಮ. ನಂತರ ದೀರ್ಘವಾಗಿ ಉಸಿರಾಡಿ. ಕೈ ಬೆರಳುಗಳು ಮತ್ತು ಕಾಲ್ಬೆರಳುಗಳನ್ನು ಅಲುಗಾಡಿಸಲು ಪ್ರಾರಂಭಿಸಿ, ನಿಧಾನವಾಗಿ ನಿಮ್ಮ ದೇಹವನ್ನು ಪುನರುಜ್ಜೀವನಗೊಳಿಸುತ್ತದೆ. ಪೂರ್ಣ ದೇಹವನ್ನು ಕೈಯಿಂದ ಪಾದದವರೆಗೆ ಅಲುಗಾಡಿಸಿದ ಬಳಿಕ ನಿಮ್ಮ ತೋಳುಗಳನ್ನು ಮೇಲಕ್ಕೆ ಚಾಚಿ. ನಿಮ್ಮ ಮೊಣಕಾಲುಗಳನ್ನು ನಿಮ್ಮ ಎದೆಗೆ ತಂದು ಒಂದು ಬದಿಗೆ ಸುತ್ತಿಕೊಳ್ಳಿ, ನಿಮ್ಮ ಕಣ್ಣುಗಳನ್ನು ಮುಚ್ಚಿ. ನಂತರ ನಿಧಾನವಾಗಿ ಕುಳಿತುಕೊಳ್ಳಿ. ಎರಡೂ ಕೈಗಳನ್ನು ಉಜ್ಜಿ ಕಣ್ಣಿನ ಮೇಲೆ ಇರಿಸಿ ಕಣ್ಣನ್ನು ತೆರೆಯಿರಿ. ಇದರಿಂದ ನಿಮ್ಮಲ್ಲಿ ಧನಾತ್ಮಕ ಶಕ್ತಿ ಸ್ಪುಟಿಸುತ್ತದೆ.

ಬಾಲಾಸನ

ಮಾನಸಿಕ ಆರೋಗ್ಯವನ್ನು ಉತ್ತಮವಾಗಿರಿಸಿ, ಟೆನ್ಷನ್‌ ಮುಕ್ತವಾಗಿಡುವಂತೆ ಮಾಡಲು ಬಾಲಾಸನ ಸಹಾಯಕವಾಗಿದೆ. ಬಾಲಾಸನ ಮಾಡುವುದರಿಂದ ಮೆದುಳಿಗೆ ಆರಾಮಾದಾಯಕ ಸ್ಥಿತಿ ದೊರಕುತ್ತದೆ. ಜೊತೆಗೆ ಕೈ, ಕಾಲುಗಳಿಗೆ ರಿಲಾಕ್ಸ್‌ ಆದ ಅನುಭವವಾಗುತ್ತದೆ.

ಮಾಡುವ ವಿಧಾನ

ನಿಮ್ಮ ಯೋಗ ಚಾಪೆಯ ಮೇಲೆ ಮಂಡಿಯೂರಿ, ಹಿಮ್ಮಡಿಗಳನ್ನು ಹಿಂದಕ್ಕೆ ಮಡಚಿ ಅಂದರೆ ವಜ್ರಾಸನದ ರೀತಿಯಲ್ಲಿ ಕುಳಿತುಕೊಳ್ಳಿ. ಕಾಲು ಮಡಚಿದ ಮೇಲೆ ನಿಮ್ಮ ಪಾದಗಳನ್ನು ಹತ್ತಿರಕ್ಕೆ ತನ್ನಿ ದೇಹದ ಮೇಲ್ಭಾಗವು ಸಾಧ್ಯವಾದಷ್ಟು ನೇರವಾಗಿರಬೇಕು. ನಂತರ, ಮಗುವಿನ ಭಂಗಿಯಲ್ಲಿರುವಾಗ, ನಿಮ್ಮ ಹಣೆಯನ್ನು ಆರಾಮವಾಗಿ ನೆಲದ ಮೇಲೆ ಇರಿಸಿ. ನಿಮ್ಮ ಹಣೆಯು ನೆಲವನ್ನು ಸ್ಪರ್ಶಿಸದಿದ್ದರೆ ನೀವು ಕುಶನ್‌ಗಳನ್ನು ಸಹ ಬಳಸಬಹುದು. ಈ ಸ್ಥಾನದಲ್ಲಿ ಉಳಿದು ಒಂದರಿಂದ ಐದರವರೆಗೆ ಎಣಿಸಿಕೊಳ್ಳಿ. ನಂತರ ನಿಧಾನವಾಗಿ ಉಸಿರುಬಿಡುತ್ತ ನೇರವಾಗಿ ಕುಳಿತುಕೊಳ್ಳಿ.

ಸೇತು ಬಂಧ ಸರ್ವಾಂಗಾಸನ

ಈ ಆಸನವು ಮೆದುಳನ್ನು ಶಾಂತಗೊಳಿಸಲು ಸಹಕಾರಿಯಾಗಿದೆ. ಈ ಸೇತು ಬಂಧ ಸರ್ವಾಂಗಾಸನವು ಮನಸ್ಸನ್ನು ನಿಗ್ರಹಿಸಲು ಮತ್ತು ಕೋಪ, ಟೆನ್ಷನ್ನು ಕಡಿಮೆ ಮಾಡಲು ಸಹಾಯಕವಾಗಿದೆ. ಆರಾಮದಲ್ಲಿ ಮಲಗಿ ಮಾಡುವ ಆಸನ ಇದಾಗಿದೆ.

ಮಾಡುವ ವಿಧಾನ

ನಿಮ್ಮ ಬೆನ್ನಿನ ಮೇಲೆ ಮಲಗಿ, ಎರಡೂ ಮೊಣಕಾಲುಗಳನ್ನು ಬಗ್ಗಿಸಿ ಮತ್ತು ಪಾದಗಳನ್ನು ನೆಲದ ಮೇಲಿಟ್ಟು ಸೊಂಟದ ಭಾಗವನ್ನು ಅಗಲದಲ್ಲಿ ಇರಿಸಿ. ಅಂಗೈಗಳು ಕೆಳಮುಖವಾಗಿ ನೆಲಕ್ಕೆ ತಾಗಿಸಿ ಇರಿಸಿಕೊಳ್ಳಿ. ನಂತರ ಎದೆಯನ್ನು ಭಾಗವನ್ನು ನಿಧಾನಕ್ಕೆ ಮೇಲಕ್ಕೆತ್ತಿ ತೋಳುಗಳು ಮತ್ತು ಭುಜಗಳಿಗೆ ಕೆಳಗೆ ಒತ್ತಿರಿ. ಕಾಲುಗಳ ಸಹಾಯದಿಂದ ಸೊಂಟವನ್ನು ಮೇಲಕ್ಕೆ ಎತ್ತಿರಿ. 4 ರಿಂದ 8 ಬಾರಿ ಅದೇ ಭಂಗಿಯಲ್ಲಿ ಉಸಿರಾಟ ನಡೆಸಿ. ನಂತರ ನಿಧಾನವಾಗಿ ಮೂಲ ಸ್ಥಿತಿಗೆ ಬನ್ನಿ.

ಉತ್ಥಾನಾಸನ

ಈ ಆಸನದಿಂದ ಮಾನಸಿಕವಾಗಿ ಆರೋಗ್ಯಯುತವಾಗಿರಬಹುದು. ಉತ್ಥಾನಾಸನ ಮಾಡುವುದರಿಂದ ರಿಲಾಕ್ಸ್‌ ಮೂಡನ್ನು ಪಡೆಯಬಹುದಾಗಿದೆ. ಆದರೆ ನೆನಪಿಡಿ ಈ ಆಸನವನ್ನು ಮಾಡುವ ಯೋಗ ತಜ್ಞರ ಸಲಹೆಯನ್ನು ಪಡೆದುಕೊಳ್ಳಿ. ಆಗ ಮಾತ್ರ ಉತ್ತಮ ಫಲಿತಾಂಶವನ್ನು ಪಡೆಯಬಹುದಾಗಿದೆ.

ಮಾಡುವ ವಿಧಾನ

ಇದನ್ನು ಮಾಡಲು, ಮೊದಲು ನೇರವಾಗಿ ನಿಂತುಕೊಳ್ಳಿ. ನಂತರ ನಿಧಾನವಾಗಿ ಸೊಂಟದಿಂದ ಮುಂದಕ್ಕೆ ಬಗ್ಗಿರಿ. ಎರಡೂ ಕೈಗಳಲ್ಲಿ ಕಾಲಿನ ತೋರುಬೆರಳನ್ನು ಹಿಡಿದುಕೊಳ್ಳಿ. ನೆನಪಿರಲಿ ನೀವು ಸಂಪೂರ್ಣ ಬಗ್ಗಿದಾಗ ಕಾಲು ನೇರವಾಗಿಯೇ ಇರಬೇಕು. ಈ ಆಸನ ಹೊಟ್ಟೆಯಲ್ಲಿ ಆಸಿಡಿಟಿ, ಗ್ಯಾಸ್ಟ್ರಿಕ್‌ ಆಗಿದ್ದರೆ ಸುಲಭವಾಗಿ ಹೋಗಲಾಡಿಸುತ್ತದೆ.

ಮರ್ಜರಿ ಆಸನ

ಮರ್ಜರಿ ಆಸನವನ್ನು ಕ್ಯಾಟ್‌ ಪೋಸ್‌ ಅಥವಾ ಬೆಕ್ಕಿನ ಭಂಗಿ ಎಂತಲೂ ಕರೆಯುತ್ತಾರೆ. ಸುಲಭವಾಗಿ ಮಾಡುವ ಈ ಆಸನ ಸಿಟ್ಟನ್ನು ಕಡಿಮೆಗೊಳಿಸಿ ಮನಸ್ಸನ್ನು ಶಾಂತಿಯುತವಾಗಿರುವಂತೆ ಮಾಡುತ್ತದೆ. ಹೀಗಾಗಿ ಮನಸ್ಸಿನ ನಿಗ್ರಹಕ್ಕೆ ಈ ಆಸನ ಬೆಸ್ಟ್‌ ಆಗಿದೆ.

ಮಾಡುವ ವಿಧಾನ

ಮೊದಲು ವಜ್ರಾಸನದಲ್ಲಿ ಕುಳಿತುಕೊಳ್ಳಿ. ನಂತರ ನಿಧಾನವಾಗಿ ಮುಂದಕ್ಕೆ ಭಾಗಿ ಎರಡೂ ಕೈಗಳನ್ನು ನೆಲಕ್ಕೆ ಇರಿಸಿಕೊಳ್ಳಿ. ಮೊಣಕಾಲಿನ ಮೇಲೆ ನಿಂತುಕೊಳ್ಳಿ. ನಿಮ್ಮ ತೋಳುಗಳನ್ನು ನೆಲಕ್ಕೆ ಲಂಬವಾಗಿ ಇರಿಸಿ, ಕೈಗಳನ್ನು ನೇರವಾಗಿ ಭುಜಗಳ ಕೆಳಗೆ ಮತ್ತು ನೆಲದ ಮೇಲೆ ಚಪ್ಪಟೆಯಾಗಿ ಇರಿಸಿ ನಿಮ್ಮ ಮೊಣಕಾಲುಗಳು ಸೊಂಟದ ಅಗಲದಲ್ಲಿರಲಿ. ನೇರವಾಗಿ ಮುಂದೆ ನೋಡಿ. ನಂತರ ಬೆಕ್ಕಿನಂತೆ ಕುಳಿತುಕೊಳ್ಳಿ. ದೀರ್ಘವಾದ ಉಸಿರನ್ನು ತೆಗೆದುಕೊಳ್ಳಿ. ನೀವು ಉಸಿರಾಡುವಾಗ, ನಿಮ್ಮ ಗಲ್ಲವನ್ನು ಎದೆಯ ಬಳಿ ಇರಿಸಿಕೊಳ್ಳಿ. ಸಾಧ್ಯವಾದಷ್ಟು ನಿಮ್ಮ ಬೆನ್ನನ್ನು ಮೇಲಕ್ಕೆತ್ತಿ. ನೀವು ಈ ಯೋಗಾಸನದಿಂದ ಹೊರಬರುವ ಮೊದಲು ಐದು ಅಥವಾ ಆರು ಬಾರಿ ಉಸಿರಾಟ ನಡೆಸಿ.