ಬೆಂಗಳೂರು (Bengaluru): ಡೆಲಿವರಿ ಬಾಯ್‌ ಒಬ್ಬ ಮೂವರು ಮಹಿಳೆಯರೊಂದಿಗೆ ಅಸಭ್ಯವಾಗಿ ವರ್ತಿಸಿರುವ ನೀಡಿರುವ ಪ್ರಕರಣ ಶೇಷಾದ್ರಿಪುರಂ ಉಪವಿಭಾಗದಲ್ಲಿ ನಡೆದಿದೆ.
ಖಾಸಗಿ ಕಂಪೆನಿಗಳಲ್ಲಿ ಕೆಲಸ ಮಾಡುವ ಮಹಿಳೆಯರು ವಾರಾಂತ್ಯದ ದಿನಗಳಲ್ಲಿ ಸ್ನೇಹಿತೆಯರ ಜತೆ ನಗರದ ಹಲವು ಕಡೆ ಸೈಕ್ಲಿಂಗ್‌ ಮಾಡುವ ಅಭ್ಯಾಸ ಇಟ್ಟುಕೊಂಡಿದ್ದಾರೆ. ಅದೇ ರೀತಿ ಇಬ್ಬರು ಮಹಿಳೆಯರು ಜುಲೈ 3ರ ಮುಂಜಾನೆ ಆರು ಗಂಟೆಗೆ ಬಿಇಎಲ್‌ ಸರ್ಕಲ್‌, ಭಾಷ್ಯಂ ಸರ್ಕಲ್‌ ಮಾರ್ಗದಲ್ಲಿ ಸೈಕ್ಲಿಂಗ್‌ ಹೊರಟಿದ್ದಾಗ ಒಬ್ಬಾತ ಅವರ ಹಿಂಭಾಗಕ್ಕೆ ಕೈಯಲ್ಲಿ ಹೊಡೆದು ಅಸಭ್ಯವಾಗಿ ವರ್ತಿಸಿ ಪರಾರಿಯಾಗಿದ್ದಾನೆ. ಬಳಿಕ ಮತ್ತೊಬ್ಬ ಸಂತ್ರಸ್ತೆ ಭಾಷ್ಯಂ ಸರ್ಕಲ್‌ನಲ್ಲಿ ಹೋಗುತ್ತಿದ್ದಾಗ ಅವರಿಗೂ ಲೈಂಗಿಕ ಕಿರುಕುಳ ನೀಡಿದ್ದಾನೆ.
ಮೂವರು ಸಂತ್ರಸ್ತೆಯರು ತಮಗಾದ ಕಿರುಕುಳದ ಕುರಿತು ಸದಾಶಿವನಗರ ಠಾಣೆ ಮತ್ತು ವೈಯಾಲಿಕಾವಲ್‌ ಠಾಣೆಯಲ್ಲಿ ದೂರು ನೀಡಿದ್ದಾರೆ. ದಾಖಲಿಸಿಕೊಂಡಿರುವ ಪೊಲೀಸರು ಆರೋಪಿ ಬಂಧನಕ್ಕೆ ಬಲೆ ಬೀಸಿದ್ದಾರೆ.
ಹೆಲ್ಮೆಟ್‌ ಧರಿಸಿ ಬೈಕ್‌ ಚಲಾಯಿಸುತ್ತಿದ್ದ ಯುವಕ ಬೈಕ್‌ನಲ್ಲಿ ಡೆಲಿವರಿ ಬ್ಯಾಗ್‌ ಇಟ್ಟುಕೊಂಡಿದ್ದ ಎಂದು ಸಂತ್ರಸ್ತೆಯರು ದೂರಿನಲ್ಲಿ ಉಲ್ಲೇಖಿಸಿದ್ದಾರೆ. ಹೀಗಾಗಿ, ಘಟನೆ ನಡೆದ ದಿನ ಆ ಭಾಗದಲ್ಲಿ ಯಾವ ಡೆಲಿವರಿ ಬಾಯ್‌ಗಳು ಕಾರ್ಯನಿರ್ವಹಿಸುತ್ತಿದ್ದರು ಎಂಬುದರ ಮಾಹಿತಿ ಕಲೆ ಹಾಕಲಾಗುತ್ತಿದೆ. ಜತೆಗೆ, ಆ ಮಾರ್ಗದಲ್ಲಿನ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸುತ್ತಿದ್ದು, ಹಲವು ಆಯಾಮಗಳಲ್ಲಿ ಆರೋಪಿಯ ಬಂಧನಕ್ಕೆ ಕ್ರಮ ವಹಿಸಲಾಗಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದರು.
