ನವದೆಹಲಿ: ಆಫ್ರಿಕಾದ ಕೆಲವು ರಾಷ್ಟ್ರಗಳಲ್ಲಿ ಎಬೋಲಾ ಸೋಂಕಿನ ಆತಂಕ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ (DGCA) ವಿಮಾನಯಾನ ಸಂಸ್ಥೆಗಳಿಗೆ ಹಲವು ಮುನ್ನೆಚ್ಚರಿಕಾ ಕ್ರಮಗಳನ್ನು ಅನುಸರಿಸುವಂತೆ ಸೂಚಿಸಿದೆ. ವಿಮಾನಗಳಲ್ಲಿ ಆರೋಗ್ಯ ಎಚ್ಚರಿಕೆ ಪ್ರಕಟಣೆ ನೀಡುವುದು ಹಾಗೂ ಸೋಂಕು ಪೀಡಿತ ದೇಶಗಳಿಂದ ಬರುವ ಅಥವಾ ಆ ದೇಶಗಳ ಮೂಲಕ ಪ್ರಯಾಣಿಸುವ ಪ್ರಯಾಣಿಕರಿಂದ ಸ್ವಯಂ ಘೋಷಣೆ ನಮೂನೆ (Self Declaration Form) ಕಡ್ಡಾಯವಾಗಿ ಪಡೆಯುವುದು ಸೇರಿದಂತೆ ವಿವಿಧ ನಿಯಮಗಳನ್ನು ಜಾರಿಗೆ ತರಲಾಗಿದೆ.
ಎಬೋಲಾ ಸೋಂಕು ಹರಡುವಿಕೆಯನ್ನು ತಡೆಯಲು ಸಾರ್ವಜನಿಕ ಆರೋಗ್ಯ ಸಿದ್ಧತೆ ಮತ್ತು ತುರ್ತು ಪ್ರತಿಕ್ರಿಯೆಗಾಗಿ DGCA ವಿಶೇಷ ಪ್ರಮಾಣಿತ ಕಾರ್ಯಾಚರಣಾ ವಿಧಾನ (SOP) ಪ್ರಕಟಿಸಿದೆ. ಉಗಾಂಡಾ ಮತ್ತು ಕಾಂಗೋ ದೇಶಗಳೊಂದಿಗೆ ನೇರ ಅಥವಾ ಪರೋಕ್ಷ ಸಂಪರ್ಕ ಹೊಂದಿರುವ ವಿಮಾನಯಾನ ಸಂಸ್ಥೆಗಳು, ಪ್ರಯಾಣಿಕರು ವಿಮಾನದಿಂದ ಇಳಿಯುವ ಮೊದಲು ಸ್ವಯಂ ಘೋಷಣೆ ನಮೂನೆಗಳನ್ನು ಸಂಗ್ರಹಿಸುವುದು ಕಡ್ಡಾಯ ಎಂದು ಸೂಚಿಸಲಾಗಿದೆ.
DGCA ಉಲ್ಲೇಖಿಸಿರುವ ಕಾಂಗೋದಿಂದ ಪ್ರಯಾಣಿಕರನ್ನು ಸಾಗಿಸುವ 13 ವಿಮಾನಯಾನ ಸಂಸ್ಥೆಗಳ ಪಟ್ಟಿಯಲ್ಲಿ ಏರ್ ಇಂಡಿಯಾ, ಇಂಡಿಗೋ, ಅಕಾಸಾ ಏರ್, ಎಮಿರೇಟ್ಸ್, ಏರ್ ಫ್ರಾನ್ಸ್, ಎತಿಹಾದ್ ಏರ್ವೇಸ್ ಮತ್ತು ಈಜಿಪ್ಟ್ ಏರ್ ಸೇರಿವೆ. ಇದೇ ವೇಳೆ, ಉಗಾಂಡಾದಿಂದ ಪ್ರಯಾಣಿಕರನ್ನು ಸಾಗಿಸುವ 17 ಏರ್ ಲೈನ್ ಸಂಸ್ಥೆಗಳ ಪಟ್ಟಿಯಲ್ಲಿ ಏರ್ ಇಂಡಿಯಾ, ಇಂಡಿಗೋ ಹಾಗೂ ಕೆಎಲ್ಎಂ ಕೂಡ ಸೇರಿವೆ.
ವಿಮಾನದಲ್ಲಿ ಪ್ರಯಾಣಿಕರಿಗೆ ಎಬೋಲಾ ಸೋಂಕಿನ ಬಗ್ಗೆ ಜಾಗೃತಿ ಮೂಡಿಸಲು ಪ್ರಕಟಣೆ ನೀಡಬೇಕು ಎಂದು DGCA ಸೂಚಿಸಿದೆ. ಜ್ವರ, ದೌರ್ಬಲ್ಯ, ಸ್ನಾಯು ನೋವು, ತಲೆನೋವು, ಗಂಟಲು ನೋವು, ವಾಂತಿ, ಅತಿಸಾರ, ಚರ್ಮದ ದದ್ದು ಹಾಗೂ ರಕ್ತಸ್ರಾವ ಸೇರಿದಂತೆ ಎಬೋಲಾ ಲಕ್ಷಣಗಳು ಕಂಡುಬಂದರೆ ತಕ್ಷಣವೇ ವಿಮಾನ ಸಿಬ್ಬಂದಿ ಹಾಗೂ ಆಗಮನದ ವೇಳೆ ವೈದ್ಯಕೀಯ ಘಟಕಕ್ಕೆ ಮಾಹಿತಿ ನೀಡಬೇಕು ಎಂದು ಪ್ರಕಟಣೆಗಳಲ್ಲಿ ತಿಳಿಸಬೇಕು.ವಿಮಾನಯಾನ ಸಂಸ್ಥೆಗಳು ತಮ್ಮ ಪ್ರಕಟಣೆಗಳಲ್ಲಿ “ಎಲ್ಲಾ ಪ್ರಯಾಣಿಕರು ಹಾಗೂ ಸಿಬ್ಬಂದಿ ಸದಸ್ಯರು ರಾಷ್ಟ್ರೀಯತೆಯನ್ನು ಲೆಕ್ಕಿಸದೆ ಸ್ವಯಂ ಘೋಷಣೆ ನಮೂನೆಯನ್ನು ಭರ್ತಿ ಮಾಡಿ ವಲಸೆ ಅಥವಾ ನಿಯೋಜಿತ ಕೌಂಟರ್ಗೆ ಸಲ್ಲಿಸಬೇಕು” ಎಂಬ ಸೂಚನೆಯನ್ನು ಕಡ್ಡಾಯವಾಗಿ ಸೇರಿಸಬೇಕು ಎಂದು ಮೇ 22ರಂದು DGCA ಹೊರಡಿಸಿದ ಸಲಹೆಯಲ್ಲಿ ತಿಳಿಸಲಾಗಿದೆ.
ಶಂಕಿತ ಎಬೋಲಾ ಪ್ರಕರಣಗಳು ಪತ್ತೆಯಾದರೆ ಅನುಸರಿಸಬೇಕಾದ ವಿಮಾನ ಮತ್ತು ಆಗಮನ ಪ್ರೋಟೋಕಾಲ್ಗಳನ್ನೂ DGCA ವಿವರಿಸಿದೆ. ಇಂತಹ ಪರಿಸ್ಥಿತಿಯಲ್ಲಿ ವಿಮಾನವನ್ನು ಪ್ರತ್ಯೇಕವಾಗಿ ಗುರುತಿಸಲಾದ ಬೇಯಲ್ಲಿ ನಿಲ್ಲಿಸಬೇಕು ಎಂದು ಸೂಚಿಸಲಾಗಿದೆ.ವಿಮಾನದಲ್ಲಿ ಶಂಕಿತ ಪ್ರಯಾಣಿಕರು ಕಂಡುಬಂದರೆ ಅವರನ್ನು ವಿಮಾನದ ಹಿಂಭಾಗಕ್ಕೆ ಸ್ಥಳಾಂತರಿಸಬೇಕು. ಸಾಧ್ಯವಾದರೆ, ಆ ಪ್ರಯಾಣಿಕರ ಮುಂಭಾಗ ಮತ್ತು ಪಕ್ಕದ ಮೂರು ಸಾಲುಗಳನ್ನು ಖಾಲಿ ಇಡಬೇಕು ಎಂದು DGCA ಹೇಳಿದೆ.
ಇದಲ್ಲದೆ, ಟ್ರಿಪಲ್ ಲೇಯರ್ ಮಾಸ್ಕ್, ಬಿಸಾಡಬಹುದಾದ ಕೈಗವಸುಗಳು, PPE ಕಿಟ್ಗಳು, ಹ್ಯಾಂಡ್ ಸ್ಯಾನಿಟೈಸರ್ ಹಾಗೂ ಜೈವಿಕ ಅಪಾಯ ವಿಲೇವಾರಿ ಚೀಲಗಳ ಸಾಕಷ್ಟು ಸಂಗ್ರಹವನ್ನು ಕಡ್ಡಾಯವಾಗಿ ಇಟ್ಟುಕೊಳ್ಳಬೇಕು ಎಂದು ಏರ್ ಲೈನ್ ಸಂಸ್ಥೆಗಳಿಗೆ ಸೂಚಿಸಲಾಗಿದೆ.“ರೋಗಲಕ್ಷಣಗಳನ್ನು ತಿಳಿಸುವ ಪ್ರಯಾಣಿಕರು ಹಾಗೂ ಸಂಪರ್ಕದಲ್ಲಿರುವವರಿಗೆ ಈ ಸುರಕ್ಷತಾ ಸಾಮಗ್ರಿಗಳನ್ನು ಬಳಸಬೇಕು” ಎಂದು DGCA ಸ್ಪಷ್ಟಪಡಿಸಿದೆ.ಇದೇ ವೇಳೆ, ಕೇಂದ್ರ ಆರೋಗ್ಯ ಸಚಿವ ಜೆ ಪಿ ನಡ್ಡಾ ಅವರು ದೇಶದಲ್ಲಿ ಇದುವರೆಗೆ ಯಾವುದೇ ಎಬೋಲಾ ಪ್ರಕರಣ ವರದಿಯಾಗಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಭಾರತದಲ್ಲಿ ಸಂಭವನೀಯ ಸೋಂಕು ಹರಡುವಿಕೆ ತಡೆಯಲು ಅಗತ್ಯ ಸಿದ್ಧತೆ ಮತ್ತು ಕಣ್ಗಾವಲು ಕ್ರಮಗಳನ್ನು ಪರಿಶೀಲಿಸಲಾಗಿದೆ ಎಂದು ಅವರು ತಿಳಿಸಿದ್ದಾರೆ.
