ಮನೆ ಪ್ರವಾಸ ಜನಸಂದಣಿ ಇಲ್ಲದ ಪ್ರವಾಸಿ ತಾಣಗಳು

ಜನಸಂದಣಿ ಇಲ್ಲದ ಪ್ರವಾಸಿ ತಾಣಗಳು

September 23, 2022

ಜನರು ಕಡಿಮೆ ಇರುವಾಗ ಪ್ರವಾಸ ಮಾಡಿಬಿಡಬೇಕು ಎಂದು ಬಹುತೇಕರು ಅಂದುಕೊಳ್ಳುತ್ತಾರೆ. ಇದರಿಂದ ಸಂಪೂರ್ಣವಾದ ಪ್ರವಾಸದ ಅನುಭೂತಿಯನ್ನು ಪಡೆಯುವುದರ ಜೊತೆಗೆ ಪ್ರವಾಸಕ್ಕೆ ಯಾವುದೇ ಕೊಂದುಕೊರತೆ ಎದುರಾಗುವುದಿಲ್ಲ.

ಇಂತಹ ಪ್ರಶಾಂತವಾದ ತಾಣಗಳು ನಮ್ಮ ಭಾರತದಲ್ಲಿ ಎಲ್ಲಿವೆ ಎಂದು ಯೋಚಿಸುತ್ತಿದ್ದೀರಾ? ಹೌದು, ನಮ್ಮ ಭಾರತದಲ್ಲಿ ನೆಮ್ಮದಿಯನ್ನು ಇಮ್ಮಡಿಗೊಳಿಸುವ ತಾಣಗಳಿವೆ. ಅವು ಒಂದಕ್ಕಿಂತ ಒಂದು ಆಹ್ಲಾದಕರವಾಗಿವೆ.

ಗೋಕರ್ಣ

ಕರ್ನಾಟಕದ ಗೋಕರ್ಣ ಸುಂದರವಾದ ಪಟ್ಟಣವಾಗಿದೆ. ಇಲ್ಲಿ ಧಾರ್ಮಿಕತೆಯನ್ನು ಹೆಚ್ಚಿಸುವ ದೇವಾಲಯವಿದೆ. ಆಲಯದ ಸಮೀಪದಲ್ಲಿ ಆಹ್ಲಾದಕರವಾದ ಕಡಲತೀರವಿದ್ದು, ಭಾರತದಾದ್ಯಂತ ಪ್ರವಾಸಿಗರು, ಯಾತ್ರಿಕರು ಗೋಕರ್ಣ ಕ್ಷೇತ್ರಕ್ಕೆ ಭೇಟಿ ನೀಡುತ್ತಾರೆ.

ಭಾರತ ದೇಶದ ಕೆಲವು ಸ್ವಚ್ಚವಾದ ಕಡಲತೀರಗಳಲ್ಲಿ ಗೋಕರ್ಣ ಕಡಲತೀರವು ಒಂದು. ಇಲ್ಲಿ ವಿಶ್ರಾಂತಿ ಪಡೆಯಲು, ಈಜಲು ಮತ್ತು ಸರ್ಫಿಂಗ್ನಂತಹ ಜಲ ಕ್ರೀಡೆಗಳನ್ನು ಅನ್ವೇಷಣೆ ಮಾಡಲು ಸೂಕ್ತವಾಗಿದೆ. ಇಲ್ಲಿ ನೆಮ್ಮದಿಯಿಂದ ಕೆಲವು ದಿನಗಳು ಕಾಲ ಕಳೆಯಲು ಅತಿಥಿ ಗೃಹಗಳಿವೆ. ಕುಟುಂಬ ಸಮೇತ ಗೋಕರ್ಣ ಕ್ಷೇತ್ರಕ್ಕೆ ಹೋಗಬಹುದು.

ಗ್ಯಾಂಗ್ಟಾಕ್

ಗ್ಯಾಂಗ್ಟಾಕ್ ಜನಸಂದಣಿಯಿಂದ ಮುಕ್ತವಾಗಿರುವ ಒಂದು ಆಹ್ಲಾದಕರವಾದ ನಗರ. ಇದು ಭಾರತದ 8 ನೇ ಸ್ವಚ್ಛವಾದ ನಗರ ಕೂಡ ಹೌದು. ಸಿಕ್ಕಿಂ ರಾಜಧಾನಿ ಗ್ಯಾಂಗ್ಟಾಕ್ ಶ್ರೀಮಂತ ನೈಸರ್ಗಿಕ ವೈಭವಕ್ಕೆ ಸಾಕ್ಷಿಯಾಗಿದೆ. ರುಚಿ ರುಚಿಯಾದ ಭಕ್ಷ್ಯಗಳನ್ನು ಸವಿಯಲು ರೆಸ್ಟೋರೆಂಟ್ಗಳು, ರೋಮಾಂಚಕ ಅನುಭೂತಿಯನ್ನು ಪಡೆಯಲು ಸಾಹಸ ಚಟುವಟಿಕೆಗಳು ಇನ್ನು ಹಲವಾರು ರೋಮಾಂಚಕ ಅನುಭವಗಳನ್ನು ಆನಂದಿಸಬಹುದು.

ಅಷ್ಟೇ ಅಲ್ಲ, ರಾತ್ರಿಯ ಜೀವನ ಕಳೆಯಲು ಮತ್ತು ಶಾಪಿಂಗ್ ಮಾಡಲು ಇದು ಅತ್ಯುತ್ತಮವಾದ ತಾಣ ಎಂದೇ ಹೇಳಬಹುದು. ಗ್ಯಾಂಗ್ಟಾಕ್ನಲ್ಲಿ ಪ್ರತಿ ವರ್ಷ ಬೇಸಿಗೆಯ ಸಮಯದಲ್ಲಿ ಉತ್ಸವ ಹಮ್ಮಿಕೊಳ್ಳಲಾಗುತ್ತದೆ. ಆ ಸಮಯದಲ್ಲಿ ಆಸಕ್ತಿದಾಯಕವಾದ ಸ್ಪರ್ಧೆಗಳನ್ನು ನೀವು ನೋಡಿ ಎಂಜಾಯ್ ಮಾಡಬಹುದು.

ಮಾವ್ಲಿನ್ನಾಂಗ್

ಭಾರತದ ಸ್ವಚ್ಛವಾದ ಗ್ರಾಮ ಎಂದೇ ಜನಪ್ರಿಯವಾಗಿರುವ ಮಾವ್ಲಿನ್ನಾಂಗ್ ಅತ್ಯಂತ ಸುಂದರವಾಗಿದೆ. ಮೇಘಾಲಯದ ಪಶ್ಚಿಮ ಖಾಸಿ ಬೆಟ್ಟಗಳಲ್ಲಿರುವ ಈ ಪುಟ್ಟ ಗ್ರಾಮ ಜನಜಂಗುಳಿಯಿಂದ ದೂರದಲ್ಲಿದೆ. ಇನ್ನು ಸ್ವಚ್ಛವಾದ ಮತ್ತು ಅಪ್ಪಟ ಗ್ರಾಮವನ್ನು ಅನ್ವೇಷಿಸಲು ನೀವು ಇಲ್ಲಿಗೆ ಭೇಟಿ ನೀಡಲೇಬೇಕು.

ಇಲ್ಲಿ ಖಾಸಿ ಬುಡಕಟ್ಟಿನ ನಿವಾಸಿಗಳು ತಮ್ಮ ಪ್ರಾಚೀನ ಸಂಪ್ರದಾಯಗಳನ್ನು ಇಂದಿಗೂ ಉಳಿಸಿಕೊಂಡು ಬಂದಿದ್ದಾರೆ. ಇನ್ನು ಭಾರತದಲ್ಲಿರುವ ಎಲ್ಲಾ ಗ್ರಾಮಗಳು ಕೂಡ ಮಾವ್ಲಿನ್ನಾಂಗ್ ಗ್ರಾಮದಂತೆ ಸ್ವಚ್ಛತೆಯನ್ನು ಕಾಪಾಡಬೇಕು.

ಸ್ಪಿತಿ ಕಣಿವೆ

ಹಿಮಾಚಲ ಪ್ರದೇಶದ ಸ್ಪಿತಿ ಕಣಿವೆಯು ಜನಸಂದಣಿಯಿಂದ ಮುಕ್ತವಾಗಿದೆ. ಕಡಿದಾದ ಹಿಮಾಲಯದ ಭೂಪ್ರದೇಶಗಳು ದಕ್ಷಿಣ ಭಾರತದ ಪ್ರವಾಸಿಗರಿಗೆ ಬೆರಗುಗೊಳಿಸಬಹುದು. ಈ ಮನೋಹರವಾದ ಕಣಿವೆಯಲ್ಲಿ ಸಾಟಿಯಿಲ್ಲದ ಸಾಹಸಗಳನ್ನು ಪ್ರವಾಸಿಗರು ಕೈಗೊಳ್ಳುತ್ತಾರೆ.

ಹೈಕಿಂಗ್, ಸೈಕ್ಲಿಂಗ್, ಬೈಕಿಂಗ್ ಮತ್ತು ಕ್ಯಾಂಪಿಂಗ್ನಂತಹ ಚಟುವಟಿಕೆಗಳನ್ನು ನೀವು ಇಲ್ಲಿ ಸಖತ್ ಎಂಜಾಯ್ ಮಾಡಬಹುದು. ಇಲ್ಲಿ ಪುರಾತನವಾದ ಮಠಗಳು, ತಂಪಾದ ಗಾಳಿ, ಪ್ರಶಾಂತವಾದ ಹಳ್ಳಿಗಳಿಗೆ ನೆಲೆಯಾಗಿದೆ.

ಲಾಂಡೂರ್

ತನ್ನದೇ ಆದ ಅದ್ಭುತ ದೃಶ್ಯಾವಳಿಗೆ ಈ ಲಾಂಡೂರ್ ಹೆಸರುವಾಸಿಯಾಗಿದೆ. ಹಿಮಾಲಯನ್ ಕುಗ್ರಾಮವಾಗಿರುವ ಈ ಲಾಂಡೂರ್ ಸ್ವಚ್ಛವಾದ ಮತ್ತು ಜನಸಂದಣಿಯಿಂದ ದೂರವಿರುವ ಭಾರತದ ಪ್ರಶಾಂತವಾದ ತಾಣ. ಇಲ್ಲಿ ಟ್ರೆಕ್ಕಿಂಗ್, ವಿಲಕ್ಷಣವಾದ ಕೆಫೆ ಮತ್ತು ರೋಮಾಂಚಕ ಕುಟೀರಗಳನ್ನು ಆನಂದಿಸಬಹುದು.

ಒಟ್ಟಾರೆ ಕುಟುಂಬ ಸಮೇತ ಪ್ರಶಾಂತವಾದ ತಾಣದಲ್ಲಿ ರಜಾ ದಿನಗಳನ್ನು ಕಳೆಯಲು ಬಯಸಿದರೆ ಮೇಲಿನ ಈ ಎಲ್ಲಾ ತಾಣಗಳು ಬೆಸ್ಟ್ ಎಂದೇ ಹೇಳಬಹುದು.