ನಮ್ಮ ಕರ್ನಾಟಕದಲ್ಲಿ ವಾವ್ ಎನ್ನಬಹುದಾದಂತಹ ತಾಣಗಳಿವೆ. ಅವುಗಳಲ್ಲಿ ಆಹ್ಲಾದಕರವಾದ ಕಡಲತೀರಗಳು ಕೂಡ ಸೇರಿವೆ. ಭಾರತದ ಪಶ್ಚಿಮ ಕರಾವಳಿಯ ಪಕ್ಕದಲ್ಲಿರುವ ರಾಜ್ಯದ ದೊಡ್ಡ ಪ್ರದೇಶದೊಂದಿಗೆ, ಕರ್ನಾಟಕವು ಅತ್ಯಂತ ಸುಂದರವಾದ ಕಡಲತೀರಗಳನ್ನು ಹೊಂದಿದೆ. ವರ್ಷವಿಡೀ ಪ್ರವಾಸಿಗರನ್ನು ತನ್ನತ್ತ ಕೈಬೀಸಿ ಕರೆಯುತ್ತದೆ.
ವಾಸ್ತವವಾಗಿ ಕಡಲತೀರಗಳು ಶಾಂತಿಯನ್ನು ಬಯಸುವವರಿಗೆ ಸೂಕ್ತವಾದ ತಾಣವಾಗಿದೆ. ರಜೆ ಅಥವಾ ವಾರಾಂತ್ಯದ ಸಮಯದಲ್ಲಿ ಚಿನ್ನದ ಬಣ್ಣ ಹೊಂದಿರುವ ಮರಳಿನಲ್ಲಿ ಅಡ್ಡಾಡುತ್ತಾ ಸೂರ್ಯಸ್ತದ ಅಪೂರ್ವ ದೃಶ್ಯವನ್ನು ಕಣ್ತುಂಬಿಕೊಳ್ಳಬಹುದು.
ಗೋಕರ್ಣ ಬೀಚ್
ನಮ್ಮ ಭಾರತದ ಧಾರ್ಮಿಕ ಸ್ಥಳಗಳಲ್ಲಿ ಗೋಕರ್ಣ ಕೂಡ ಒಂದು. ಶೈವ ಭಕ್ತರನ್ನು ಸೆಳೆಯುವ ಈ ತಾಣದಲ್ಲಿ ಮಹಾಶಿವನು ಲಿಂಗ ಸ್ವರೂಪಿಯಾಗಿ ನೆಲೆಸಿದ್ದಾನೆ. ಅಲ್ಲದೆ, ಆಲಯದ ಸಮೀಪದಲ್ಲಿ ಮನಸೂರೆಗೊಳ್ಳುವ ಕಡಲತೀರವಿದೆ. ವಾರಾಂತ್ಯದ ಸಮಯದಲ್ಲಿ ದೇಶದ ನಾನಾ ಭಾಗಗಳಿಂದ ಯಾತ್ರಿಕರು, ಪ್ರವಾಸಿಗರು ಗೋಕರ್ಣಕ್ಕೆ ಬರುತ್ತಾರೆ.
ಇಲ್ಲಿ ನೀವು ಹಲವಾರು ಕಡಲತೀರಗಳನ್ನು ಕಾಣಬಹುದು. ಇವುಗಳಲ್ಲಿ ಗೋಕರ್ಣ ಬೀಚ್ ಅತ್ಯಂತ ಪ್ರಸಿದ್ಧವಾಗಿದೆ. ಹಳೆಯ ತಾಳೆ ಮರಗಳಿಂದ ಕೂಡಿರುವ ವಾತಾವರಣದಲ್ಲಿ ಕುಟುಂಬದ ಜೊತೆ ಸಮಯ ಕಳೆಯಲು ಈ ಬೀಚ್ ಬೆಸ್ಟ್ ಆಗಿದೆ. ಅಷ್ಟೇ ಅಲ್ಲ, ಕರ್ನಾಟಕದ ಬೆಸ್ಟ್ ಕಡಲತೀರಗಳಲ್ಲಿ ಗೋಕರ್ಣದ ಬೀಚ್ ಕೂಡ ಒಂದು.
ಕಾರವಾರ ಬೀಚ್
ಮನಮೋಹಕ ಕಾರವಾರದ ಕಡಲತೀರಗಳು ಪ್ರವಾಸಿಗರನ್ನು ಮಂತ್ರಮುಗ್ಧಗೊಳಿಸುವುದರಲ್ಲಿ ಅನುಮಾನವೇ ಇಲ್ಲ. ಇದೊಂದು ಬಂದರು ನಗರವಾಗಿರುವ ಕಾರಣ ಆಹ್ಲಾದಕರವಾದ ವಾತಾವರಣವನ್ನು ಹೊಂದಿದೆ. ಇಲ್ಲಿ ಸಾಕಷ್ಟು ಬೀಚ್ಗಳಿವೆ. ಠಾಗೋರ್ ಬೀಚ್, ಕಾಳಿ ಬೀಚ್, ಮಜಲಿ ಬೀಚ್, ತಿಳಮತ್ತಿ ಬೀಚ್, ಕುರುಂಗಡ ದ್ವೀಪ ಬೀಚ್ ಇನ್ನು ಹಲವಾರು ಕಡಲತೀರಗಳು ಇಲ್ಲಿವೆ.
ದೇವಬಾಗ್ನಲ್ಲಿರುವ ಈ ಕಡಲತೀರವು ನಗರದ ಪ್ರವಾಸಿಗರಿಗೆ ಅತ್ಯುತ್ತಮವಾದ ತಾಣಗಳಲ್ಲಿ ಒಂದಾಗಿದೆ. ಕಾರವಾರದ ಅನೇಕ ಕಡಲತೀರಗಳಲ್ಲಿ ನಿಮ್ಮ ಸಂಗಾತಿಯೊಂದಿಗೆ ಅಡ್ಡಾಡಬಹುದು. ಒಟ್ಟಾರೆ ಕಾರವಾರದಲ್ಲಿ ಕಡಲತೀರಗಳದ್ದೇ ಕಾರು-ಬಾರು.
ಕಾಪು ಬೀಚ್
ಮಂಗಳೂರಿನ ಅತ್ಯಂತ ಜನಪ್ರಿಯವಾದ ಕಡಲತೀರಗಳಲ್ಲಿ ಕಾಪು ಕಡಲತೀರವು ಒಂದು. ಇದು ಮಂಗಳೂರಿನಿಂದ ಸುಮಾರು 50 ಕಿ.ಮೀ ಮತ್ತು ಉಡುಪಿಯಿಂದ 13 ಕಿ.ಮೀ ದೂರದಲ್ಲಿದೆ. ಇಲ್ಲಿ ಶಿಥಿಲಗೊಂಡ ಕೋಟೆಯ ಅವಶೇಷಗಳು ಮತ್ತು 100 ಅಡಿ ಎತ್ತರದ ದೀಪಸ್ತಂಭವನ್ನು ಕಾಣಬಹುದು. ಅರೇಬಿಯನ್ ಸಮುದ್ರದ ವಿಹಂಗಮ ನೋಟವನ್ನು ವೀಕ್ಷಿಸಬಹುದು.
ಬೆರಗುಗೊಳಿಸುವ ಸಮುದ್ರದ ಸೌಂದರ್ಯವನ್ನು ನೋಡಲು ಕರ್ನಾಟಕದ ಪ್ರವಾಸಿಗರು ಕಾಪು ಬೀಚ್’ಗೆ ಬರುತ್ತಾರೆ. ಈ ಕಡಲತೀರದ ಸಮೀಪದಲ್ಲಿ ಮಾರಿಯಮ್ಮನ ದೇವಾಲಯವಿದೆ. ಇಷ್ಟೇ ಅಲ್ಲ, ಇಲ್ಲಿ ಹಲವಾರು ಧಾರ್ಮಿಕ ಸ್ಥಳಗಳಿಗೆ ನೆಲೆಯಾಗಿದೆ. ನೀವು ಅಲ್ಲಿಗೂ ಹೋಗಬಹುದು.
ಮಲ್ಪೆ ಬೀಚ್
ಉಡುಪಿಯಿಂದ ಕೇವಲ 6 ಕಿ.ಮೀ ದೂರದಲ್ಲಿರುವ ಮಲ್ಪೆ ಬೀಚ್ ಅತ್ಯಂತ ಸುಂದರವಾಗಿದೆ. ತನ್ನ ಬೆರಗುಗೊಳಿಸುವ ದೃಶ್ಯಾವಳಿಗಳಿಂದ ಜನರನ್ನು ಆಕರ್ಷಿಸುತ್ತದೆ. ಇನ್ನು ಇದು ಕರ್ನಾಟಕ ಕರಾವಳಿಯಲ್ಲಿರುವ ವಾಣಿಜ್ಯ ಮತ್ತು ಆಯಕಟ್ಟಿನ ಪ್ರಮುಖ ಬಂದರು ಕೂಡ ಆಗಿದೆ. ಸಮ್ಮೋಹಗೊಳಿಸುವ ಹವಾಮಾನ, ಕಡಲತೀರದ ಸುತ್ತ ತಾಳೆ ಮರಗಳು, ನೀಲಾಕಾಶ ಮತ್ತು ಚಿನ್ನದ ಬಣ್ಣದ ಮರಳು ಮೋಡಿ ಮಾಡುತ್ತವೆ.
ಉಡುಪಿಯ ಪ್ರವಾಸ ಕೈಗೊಳ್ಳುವ ಸಾಕಷ್ಟು ಜನರು ತಪ್ಪದೇ ಮಲ್ಪೆ ಬೀಚ್ ಅನ್ನು ಮಿಸ್ ಮಾಡಿಕೊಳ್ಳುವುದಿಲ್ಲ. ಕರ್ನಾಟಕದ ಅತ್ಯಂತ ರಮಣೀಯವಾದ ಕಡಲತೀರಗಳಲ್ಲಿ ಮಲ್ಪೆ ಬೀಚ್ ಕೂಡ ಒಂದು.
ತಣ್ಣೀರುಬಾವಿ ಕಡಲತೀರ
ತಣ್ಣೀರುಬಾವಿ ಕಡಲತೀರವು ಮಂಗಳೂರಿನಲ್ಲಿರುವ ಜನಪ್ರಿಯ ಕಡಲತೀರವಾಗಿದೆ. ಇದು ತನ್ನ ಅತ್ಯದ್ಭುತವಾದ ಸೊಬಗಿನಿಂದ ಪ್ರವಾಸಿಗರನ್ನು ಆಹ್ವಾನಿಸುತ್ತದೆ. ಮಂಗಳೂರಿನ ಸ್ಥಳೀಯರು ತಪ್ಪದೇ ತಮ್ಮ ವಾರಾಂತ್ಯದ ಸಮಯದಲ್ಲಿ ಇಲ್ಲಿಗೆ ತಮ್ಮ ಕುಟುಂಬ ಸಮೇತ ಅಥವಾ ಸ್ನೇಹಿತರೊಂದಿಗೆ ಭೇಟಿ ನೀಡುತ್ತಿರುತ್ತಾರೆ.
ಸುಲ್ತಾನ್ ಬತ್ತೇರಿ ಸಮೀಪದಲ್ಲಿರುವ ಈ ಕಡಲತೀರವು ಮಂಗಳೂರಿನಿಂದ ಕೇವಲ 12 ಕಿ.ಮೀ ದೂರದಲ್ಲಿದೆ. ಇಲ್ಲಿ ಜೀವ ರಕ್ಷಕಗಳು, ಶೌಚಾಲಯಗಳು, ಪಾರ್ಕಿಂಗ್ ಸ್ಥಳಗಳು ಸೇರಿದಂತೆ ಹಲವಾರು ಅನುಕೂಲಗಳಿವೆ.
