ರಾಮ ರಾಮ ರಾಮ ಎನ್ನಿರೋ

ರಾಮ ರಾಮ ರಾಮ ಎನ್ನಿರೋ ಇಂಥ ಸ್ವಾಮಿಯ

ನಾಮವ ಮರೆಯದಿರೊ ||

||ರಾಮ ರಾಮ||

ತುಂಬಿದ ಪಟ್ಟಣಕ್ಕೆ ಒಂಭತ್ತು ಬಾಗಿಲು

ಸಂಭ್ರಮದರಸರು ಐದು ಮಂದಿ |

ಢಂಬಕತನದಿಂದ ತಿರುಗುವ ಕಾಯದಿ

ನಂಬಿ ನೆಚ್ಚಿ ನೀವು ಕೆಡಬೇಡಿರೊ

||ರಾಮ ರಾಮ||

ನೆಲೆಯಿಲ್ಲದೀಕಾಯ ಎಲುಬಿನ ಪಂಜರ

ಹೊಲಿದು ಸುತ್ತಿದ ಚರ್ಮದ ಹೊದಿಕೆ ||

ಮಲಮೂತ್ರಂಗಳು ಕೀವು ಕ್ರಿಮಿಗಳಿಂದ

ಭರಿತ ದೇಹವನೆಚ್ಚಿ ಕೆಡಬೇಡಿರೊ

||ರಾಮ ರಾಮ||

ಹರಬ್ರಹ್ಮ ಸುರರಿಂದ ವಂದಿತನಾಗಿರ್ಪ

ಹರಿಸರ್ವೋತ್ತಮನೊಬ್ಬ ಕಾಣಿರೊ ||

ಪುರಂದರ ವಿಠಲನ ಭಜನೆಯ ಮಾಡಿರೊ

ದುರಿತ ಪರ್ವತವೆಲ್ಲ ಪರಿಹಾರವೊ

||ರಾಮ ರಾಮ||