ಹೊಟ್ಟೆಯಲ್ಲಿ ಶಬ್ದ ಕೇಳಿಸುವುದು ಸಾಮಾನ್ಯವಾದ ದೈಹಿಕ ಪ್ರಕ್ರಿಯೆಯಾಗಿದೆ. ಆದರೆ ಈ ಶಬ್ದಗಳು ಪದೇ ಪದೇ ಅಥವಾ ದಿನವಿಡೀ ನಿರಂತರವಾಗಿ ಕೇಳಿಸಿದರೆ, ಹಲವರು ಆತಂಕಕ್ಕೊಳಗಾಗುತ್ತಾರೆ. ಕೆಲವರು ಇದನ್ನು ಗಂಭೀರ ಆರೋಗ್ಯ ಸಮಸ್ಯೆಯ ಲಕ್ಷಣ ಎಂದು ಭಾವಿಸುತ್ತಾರೆ. ಆದರೆ ಹೆಚ್ಚಿನ ಸಂದರ್ಭಗಳಲ್ಲಿ ಇದು ಜೀರ್ಣಾಂಗ ವ್ಯವಸ್ಥೆಯ ಸಹಜ ಕ್ರಿಯೆಯ ಭಾಗವೇ ಆಗಿರುತ್ತದೆ.
ಹೊಟ್ಟೆ ಖಾಲಿಯಾಗಿರುವಾಗ ಈ ಶಬ್ದಗಳು ಹೆಚ್ಚು ಸ್ಪಷ್ಟವಾಗಿ ಕೇಳಿಸುತ್ತವೆ. ಏಕೆಂದರೆ ಆ ಸಮಯದಲ್ಲಿ ಕರುಳಿನಲ್ಲಿ ಆಹಾರದ ಪ್ರಮಾಣ ಕಡಿಮೆಯಿರುತ್ತದೆ. ಅನಿಲ ಮತ್ತು ದ್ರವಗಳ ಚಲನೆ ಸುಲಭವಾಗಿ ಶಬ್ದ ರೂಪದಲ್ಲಿ ಕೇಳಿಸುತ್ತದೆ. ಹಸಿವಾದಾಗ ಮೆದುಳು ಮತ್ತು ಜೀರ್ಣಾಂಗ ವ್ಯವಸ್ಥೆಯ ನಡುವೆ ಸಂವಹನ ಹೆಚ್ಚಾಗಿ, ಜೀರ್ಣಕ್ರಿಯೆಯ ಚಟುವಟಿಕೆ ವೇಗ ಪಡೆಯುತ್ತದೆ.
ಆಹಾರ ಸೇವಿಸಿದ ಬಳಿಕವೂ ಹೊಟ್ಟೆಯಲ್ಲಿ ಶಬ್ದ ಉಂಟಾಗಬಹುದು. ಜೀರ್ಣಕ್ರಿಯೆ ನಡೆಯುವ ವೇಳೆ ಕರುಳಿನಲ್ಲಿನ ಚಲನೆಯಿಂದ ಈ ರೀತಿಯ ಧ್ವನಿಗಳು ಬರುತ್ತವೆ. ಬೀನ್ಸ್, ಕಾರ್ಬೊನೇಟೆಡ್ ಪಾನೀಯಗಳು, ಮಸಾಲೆ ಪದಾರ್ಥಗಳು ಹಾಗೂ ಹೆಚ್ಚಿನ ಫೈಬರ್ ಇರುವ ಆಹಾರಗಳು ಅನಿಲವನ್ನು ಹೆಚ್ಚಿಸಿ ಶಬ್ದವನ್ನು ಮತ್ತಷ್ಟು ಹೆಚ್ಚಿಸಬಹುದು. ವೇಗವಾಗಿ ಆಹಾರ ಸೇವಿಸುವುದು, ಹೆಚ್ಚು ಗಾಳಿಯನ್ನು ನುಂಗುವುದು ಅಥವಾ ಊಟವನ್ನು ಬಿಟ್ಟುಬಿಡುವುದೂ ಇದಕ್ಕೆ ಕಾರಣವಾಗಬಹುದು.
ಬಹುತೇಕ ಸಂದರ್ಭಗಳಲ್ಲಿ ಹೊಟ್ಟೆಯ ಗೊಣಗು ಶಬ್ದ ಅಪಾಯಕಾರಿಯಲ್ಲ ಮತ್ತು ಯಾವುದೇ ವಿಶೇಷ ಚಿಕಿತ್ಸೆಯ ಅಗತ್ಯವೂ ಇರುವುದಿಲ್ಲ. ಸಮಯಕ್ಕೆ ಸರಿಯಾಗಿ ಆಹಾರ ಸೇವಿಸುವುದು, ಸಾಕಷ್ಟು ನೀರು ಕುಡಿಯುವುದು, ನಿಧಾನವಾಗಿ ಆಹಾರವನ್ನು ಅಗಿಯುವುದು ಹಾಗೂ ಆರೋಗ್ಯಕರ ಆಹಾರ ಪದ್ಧತಿಯನ್ನು ಪಾಲಿಸುವುದರಿಂದ ಈ ಸಮಸ್ಯೆಯನ್ನು ನಿಯಂತ್ರಿಸಬಹುದು. ಒತ್ತಡ ಮತ್ತು ಆತಂಕವೂ ಜೀರ್ಣಕ್ರಿಯೆಯ ಚಟುವಟಿಕೆಯನ್ನು ಹೆಚ್ಚಿಸಿ ಹೊಟ್ಟೆಯ ಶಬ್ದಗಳನ್ನು ಹೆಚ್ಚು ಗಮನಾರ್ಹವಾಗುವಂತೆ ಮಾಡಬಹುದು.
ನಾವು ಆಹಾರ ಸೇವಿಸುವಾಗ ಮಾತ್ರವಲ್ಲ, ಹೊಟ್ಟೆ ಖಾಲಿಯಾಗಿದ್ದಾಗಲೂ ಜೀರ್ಣಾಂಗ ವ್ಯವಸ್ಥೆ ಕಾರ್ಯನಿರ್ವಹಿಸುತ್ತಿರುತ್ತದೆ. ಕರುಳಿನ ಸ್ನಾಯುಗಳು ನಿರಂತರವಾಗಿ ಸಂಕುಚಿತಗೊಳ್ಳುತ್ತಾ ಮತ್ತು ಸಡಿಲಗೊಳ್ಳುತ್ತಾ ಆಹಾರ ಹಾಗೂ ಜೀರ್ಣಕಾರಿ ದ್ರವಗಳನ್ನು ಮುಂದಕ್ಕೆ ತಳ್ಳುತ್ತವೆ. ಈ ಪ್ರಕ್ರಿಯೆಯ ವೇಳೆ ಹೊಟ್ಟೆಯಲ್ಲಿ ಶಬ್ದ ಉಂಟಾಗುತ್ತದೆ.
ಹೊಟ್ಟೆ ಹಲವು ಗಂಟೆಗಳ ಕಾಲ ಖಾಲಿಯಾಗಿದ್ದರೆ, ಮೆದುಳು ಜೀರ್ಣಾಂಗ ವ್ಯವಸ್ಥೆಗೆ ಸಂಕೇತ ಕಳುಹಿಸಿ ಸಂಕೋಚನ ಕ್ರಿಯೆಯನ್ನು ಆರಂಭಿಸುತ್ತದೆ. ಇದರಿಂದ ಉಳಿದಿರುವ ಆಹಾರವನ್ನು ತೆರವುಗೊಳಿಸಿ ಮುಂದಿನ ಊಟಕ್ಕೆ ಹೊಟ್ಟೆಯನ್ನು ಸಿದ್ಧಗೊಳಿಸಲಾಗುತ್ತದೆ. ಈ ವೇಳೆ ಗಾಳಿ ಮತ್ತು ದ್ರವಗಳು ಕರುಳಿನ ಮೂಲಕ ಚಲಿಸುವುದರಿಂದ ಗೊಣಗುವ ಶಬ್ದ ಕೇಳಿಸುತ್ತದೆ. ಅದಕ್ಕಾಗಿಯೇ ಹಲವರಿಗೆ ಊಟಕ್ಕೂ ಮುನ್ನ ಹೊಟ್ಟೆ ಶಬ್ದ ಮಾಡುವುದು ಸಾಮಾನ್ಯ ಅನುಭವವಾಗಿರುತ್ತದೆ.
ವೈದ್ಯಕೀಯ ಭಾಷೆಯಲ್ಲಿ ಹೊಟ್ಟೆಯಲ್ಲಿ ಕೇಳಿಸುವ ಈ ಶಬ್ದವನ್ನು “ಬೋರ್ಬೊರಿಗ್ಮಿ” ಎಂದು ಕರೆಯಲಾಗುತ್ತದೆ. ಅಂದರೆ ಆಹಾರ, ದ್ರವ ಮತ್ತು ಅನಿಲಗಳು ಹೊಟ್ಟೆ ಹಾಗೂ ಕರುಳಿನ ಮೂಲಕ ಚಲಿಸುವಾಗ ಉಂಟಾಗುವ ಧ್ವನಿಗಳು.
ಈ ಶಬ್ದಗಳು ಯಾವುದೇ ಸಮಯದಲ್ಲಿ ಉಂಟಾಗಬಹುದು. ಆದರೆ ಹೊಟ್ಟೆ ಮತ್ತು ಕರುಳು ಖಾಲಿಯಾಗಿರುವಾಗ ಅವು ಹೆಚ್ಚು ಸಕ್ರಿಯವಾಗಿರುವುದರಿಂದ ಹಸಿವಿನ ವೇಳೆ ಜನರು ಇದನ್ನು ಹೆಚ್ಚು ಗಮನಿಸುತ್ತಾರೆ.
ಅವರ ವಿವರಣೆ ಪ್ರಕಾರ, ಹೆಚ್ಚಿನ ಸಂದರ್ಭಗಳಲ್ಲಿ ಹೊಟ್ಟೆಯ ಶಬ್ದಗಳು ಜೀರ್ಣಾಂಗ ವ್ಯವಸ್ಥೆಯ ಸಹಜ ಕಾರ್ಯವಿಧಾನದ ಭಾಗವೇ ಆಗಿವೆ. ಆಹಾರ, ಅನಿಲ ಮತ್ತು ಜೀರ್ಣಕಾರಿ ದ್ರವಗಳು ಕರುಳಿನೊಳಗೆ ಚಲಿಸುವಾಗ ವಿವಿಧ ರೀತಿಯ ಧ್ವನಿಗಳು ಕೇಳಿಸಬಹುದು.
ಇಂದಿನ ಅನಿಯಮಿತ ಜೀವನಶೈಲಿಯೂ ಅತಿಯಾದ ಹೊಟ್ಟೆಯ ಶಬ್ದಕ್ಕೆ ಪ್ರಮುಖ ಕಾರಣವಾಗಿದೆ. ಸಮಯಕ್ಕೆ ಸರಿಯಾಗಿ ಆಹಾರ ಸೇವಿಸದಿರುವುದು, ದೀರ್ಘ ಸಮಯ ಹೊಟ್ಟೆ ಖಾಲಿ ಇಡುವುದು, ಅತಿವೇಗವಾಗಿ ತಿನ್ನುವುದು ಮತ್ತು ಜಂಕ್ ಫುಡ್ ಹೆಚ್ಚಾಗಿ ಸೇವಿಸುವುದು ಜೀರ್ಣಾಂಗ ವ್ಯವಸ್ಥೆಯ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತವೆ.
ಇದರ ಜೊತೆಗೆ ಒತ್ತಡ ಮತ್ತು ಆತಂಕವೂ ಹೊಟ್ಟೆಯ ಆರೋಗ್ಯದ ಮೇಲೆ ನೇರ ಪರಿಣಾಮ ಬೀರುತ್ತವೆ. ಮಾನಸಿಕ ಒತ್ತಡ ಹೆಚ್ಚಾದಾಗ ಜೀರ್ಣಕ್ರಿಯೆ ಅಸ್ತವ್ಯಸ್ತವಾಗಿ ಅನಿಲ, ಹೊಟ್ಟೆ ಉಬ್ಬರ ಮತ್ತು ಹೊಟ್ಟೆಯೊಳಗಿನ ಚಲನೆಯನ್ನು ಹೆಚ್ಚಿಸಬಹುದು. ಹೀಗಾಗಿ ಹೆಚ್ಚಿನ ಒತ್ತಡ ಅಥವಾ ಆತಂಕ ಅನುಭವಿಸುವವರಲ್ಲಿ ಹೊಟ್ಟೆಯ ಗೊಣಗು ಶಬ್ದ ಹೆಚ್ಚಾಗಿ ಕಂಡುಬರುವ ಸಾಧ್ಯತೆ ಇರುತ್ತದೆ.
