ಮೋದಿ ಭಾಗವಹಿಸಿದ್ದ ಎನ್‌ಡಿಎ ಸಭೆಯಲ್ಲಿ ಮತ್ತೆ ಗಮನ ಸೆಳೆದ ಝಲ್ ಮುರಿ; ಅಮಿತ್ ಶಾ ಪೋಸ್ಟ್ ರಾಜಕೀಯ ಚರ್ಚೆಗೆ ಕಾರಣ

ನವದೆಹಲಿ: ಪಶ್ಚಿಮ ಬಂಗಾಳದ ಜನಪ್ರಿಯ ಖಾರ-ಹುಳಿ ತಿಂಡಿ ‘ಝಲ್ ಮುರಿ’ ಮತ್ತೊಮ್ಮೆ ರಾಷ್ಟ್ರೀಯ ಮಟ್ಟದಲ್ಲಿ ಸುದ್ದಿಯ ಕೇಂದ್ರಬಿಂದುವಾಗಿದೆ. ಪ್ರಧಾನಿ ನರೇಂದ್ರ ಮೋದಿ ಅವರ ಉಪಸ್ಥಿತಿಯಲ್ಲಿ ದೆಹಲಿಯ ಭಾರತ ಮಂಟಪಂನಲ್ಲಿ ನಡೆದ ಎನ್‌ಡಿಎ ಸಭೆಯಲ್ಲೂ ಈ ಬಂಗಾಳಿ ತಿಂಡಿ ವಿಶೇಷ ಆಕರ್ಷಣೆಯಾಗಿ ಕಾಣಿಸಿಕೊಂಡಿದೆ.

ಭಾರತದ ಅತಿ ದೀರ್ಘಾವಧಿ ಸೇವೆ ಸಲ್ಲಿಸಿದ ಚುನಾಯಿತ ಪ್ರಧಾನಮಂತ್ರಿಯಾಗಿ ನರೇಂದ್ರ ಮೋದಿ ಅವರ ಸಾಧನೆಯನ್ನು ಗುರುತಿಸಿ ಬುಧವಾರ ನಡೆದ ಸಭೆಯಲ್ಲಿ ಎನ್‌ಡಿಎ ಮೈತ್ರಿಕೂಟದ ಎಲ್ಲಾ ಪ್ರಮುಖ ನಾಯಕರು ಹಾಗೂ ಬಿಜೆಪಿ ಉನ್ನತ ನಾಯಕತ್ವ ಭಾಗವಹಿಸಿತ್ತು.

ಸಭೆಯ ವೇಳೆ ಪಶ್ಚಿಮ ಬಂಗಾಳ ವಿಧಾನಸಭೆಯ ವಿರೋಧ ಪಕ್ಷದ ನಾಯಕ ಸುವೇಂದು ಅಧಿಕಾರಿ  ಸ್ವತಃ ಝಲ್ ಮುರಿ ತಯಾರಿಸಿ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ನೀಡುತ್ತಿರುವ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡಿವೆ.

ಈ ವರ್ಷದ ಏಪ್ರಿಲ್ ತಿಂಗಳಲ್ಲಿ ಜಾರ್ಗ್ರಾಮ್ ಪ್ರದೇಶದ ಸಾರ್ವಜನಿಕ ಸಭೆಯ ನಂತರ ಪ್ರಧಾನಿ ಮೋದಿ ರಸ್ತೆಬದಿ ಅಂಗಡಿಯಲ್ಲಿ ಝಲ್ ಮುರಿ ಸವಿದಿದ್ದ ಘಟನೆ ಕೂಡ ದೇಶಾದ್ಯಂತ ಗಮನ ಸೆಳೆದಿತ್ತು. ಆ ಬಳಿಕ ಆ ಅಂಗಡಿಗೆ ಭೇಟಿ ನೀಡುವವರ ಸಂಖ್ಯೆ ಹೆಚ್ಚಾಗಿದ್ದು, ಝಲ್ ಮುರಿಯ ಜನಪ್ರಿಯತೆ ಮತ್ತಷ್ಟು ವೃದ್ಧಿಯಾಗಿದೆ ಎನ್ನಲಾಗಿದೆ.

ಬಂಗಾಳದ ಆಹಾರ ಸಂಸ್ಕೃತಿಯಲ್ಲಿ ಝಲ್ ಮುರಿಯ ಜೊತೆಗೆ ‘ಮಾಚ್-ಭಾತ್’ (ಮೀನು-ಅನ್ನ) ಕೂಡ ಪ್ರಮುಖ ಸ್ಥಾನ ಹೊಂದಿದ್ದು, ಚುನಾವಣಾ ಪ್ರಚಾರದ ಸಂದರ್ಭಗಳಲ್ಲಿ ಹಲವು ರಾಜಕೀಯ ನಾಯಕರು ಈ ಸಾಂಪ್ರದಾಯಿಕ ಆಹಾರವನ್ನು ಸವಿಯುವ ಮೂಲಕ ಸುದ್ದಿಯಾಗಿದ್ದರು.

ಅಮಿತ್ ಶಾ ಪೋಸ್ಟ್ ಏಕೆ ಚರ್ಚೆಗೆ ಕಾರಣವಾಯಿತು?

ಈ ಬೆಳವಣಿಗೆಗಳ ನಡುವೆಯೇ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡ ಪೋಸ್ಟ್ ರಾಜಕೀಯ ವಲಯದಲ್ಲಿ ಸಾಕಷ್ಟು ಚರ್ಚೆಗೆ ಕಾರಣವಾಗಿದೆ.

ಎನ್‌ಡಿಎ ಸಭೆಯ ಬಳಿಕ ಅವರು, “Relished Tangy, Masaledar and Crunchy Jhalmuri at the NDA meeting” (ಎನ್‌ಡಿಎ ಸಭೆಯಲ್ಲಿ ಖಾರ, ಮಸಾಲೆಯುಕ್ತ ಮತ್ತು ಕರಕರೆಯಾದ ಝಲ್‌ಮುರಿಯನ್ನು ಸವಿದು ಆನಂದಿಸಿದೆ)  ಎಂದು ಬರೆದುಕೊಂಡಿದ್ದರು. ಇದರ ಅರ್ಥ, “ಎನ್‌ಡಿಎ ಸಭೆಯಲ್ಲಿ ಖಾರ, ಮಸಾಲೆಯುಕ್ತ ಮತ್ತು ಕರಕರೆಯಾದ ಝಲ್ ಮುರಿಯನ್ನು ಸವಿದು ಆನಂದಿಸಿದೆ” ಎಂಬುದಾಗಿದೆ.

ಆದರೆ ರಾಜಕೀಯ ವಿಶ್ಲೇಷಕರ ಗಮನ ಸೆಳೆದಿರುವುದು Tangy, Masaledar ಮತ್ತು Crunchy ಎಂಬ ಪದಗಳ ಮೊದಲ ಅಕ್ಷರಗಳು. ಈ ಮೂರು ಪದಗಳ ಮೊದಲ ಅಕ್ಷರಗಳಾದ T, M ಮತ್ತು C ಸೇರಿ TMC ಎಂಬ ಸಂಕ್ಷಿಪ್ತ ರೂಪವನ್ನು ಸೂಚಿಸುತ್ತವೆ ಎಂದು ಕೆಲವರು ವ್ಯಾಖ್ಯಾನಿಸುತ್ತಿದ್ದಾರೆ.

ಇದೇ ಸಮಯದಲ್ಲಿ All India Trinamool Congress ಪಕ್ಷದ ಕೆಲವು ಸಂಸದರ ಕುರಿತು ವಿವಿಧ ರಾಜಕೀಯ ಚರ್ಚೆಗಳು ನಡೆಯುತ್ತಿದ್ದ ಹಿನ್ನೆಲೆಯಲ್ಲಿ, ಈ ಪೋಸ್ಟ್ ಪರೋಕ್ಷ ರಾಜಕೀಯ ಸಂದೇಶವೇ ಎಂಬ ಪ್ರಶ್ನೆಗಳು ಎದ್ದಿವೆ.

ಆದಾಗ್ಯೂ, ಅಮಿತ್ ಶಾ ತಮ್ಮ ಪೋಸ್ಟ್‌ನಲ್ಲಿ ಎಲ್ಲಿಯೂ ಮಮತಾ ಬ್ಯಾನರ್ಜಿ , ಟಿಎಂಸಿ ಅಥವಾ ಯಾವುದೇ ರಾಜಕೀಯ ಬೆಳವಣಿಗೆಯನ್ನು ನೇರವಾಗಿ ಉಲ್ಲೇಖಿಸಿಲ್ಲ. ಹೀಗಾಗಿ ಪೋಸ್ಟ್‌ನಲ್ಲಿರುವ ಅಕ್ಷರಗಳ ಆಯ್ಕೆಯನ್ನು ರಾಜಕೀಯ ಸಂದೇಶವಾಗಿ ನೋಡುವುದು ವಿಶ್ಲೇಷಕರ ಅಭಿಪ್ರಾಯವಾಗಿದ್ದು, ಅದಕ್ಕೆ ಅಧಿಕೃತ ದೃಢೀಕರಣ ಇಲ್ಲ.

ಆದರೂ ಬಂಗಾಳದ ಪ್ರಸಿದ್ಧ ಝಲ್ ಮುರಿ ಮತ್ತೊಮ್ಮೆ ರಾಷ್ಟ್ರೀಯ ರಾಜಕೀಯ ಚರ್ಚೆಯ ಭಾಗವಾಗಿರುವುದು ಮಾತ್ರ ಸತ್ಯ.