ಬೆಂಗಳೂರು: ಗೊಂದಲದಿಂದ ಕೂಡಿದ್ದ ಬೆಂಗಾಲ್ ವಾರಿಯರ್ಸ್ ವಿರುದ್ಧದ ಪಂದ್ಯದಲ್ಲಿ ಬೆಂಗಳೂರು ಬುಲ್ಸ್ 40-39ರ ಒಂದು ಅಂಕದ ಅಂತರದ ಸೋಲು ಕಂಡು ನಿರಾಸೆ ಅನುಭವಿಸಿದೆ.
ಬೆಂಗಳೂರು ಬುಲ್ಸ್ 27-20ರಲ್ಲಿ ಮುನ್ನಡೆ ಪಡೆದುಕೊಂಡಿದ್ದ ವೇಳೆ ಬೆಂಗಾಲ್ ವಾರಿಯರ್ಸ್ ಪರ ಕೋರ್ಟಿನಲ್ಲಿ ಕೊನೆಯ ಆಟಗಾರನಾಗಿದ್ದ ನಬೀಬಖ್ಷ್ ರೈಡಿಂಗ್ ವೇಳೆ ಟಚ್ ಮಾಡುವ ಯತ್ನದಲ್ಲಿ ವಿಫಲರಾಗಿ ಲಾಬಿ ಲೈನ್ ಕ್ರಾಸ್ ಮಾಡಿದ್ದರು. ಲೆಫ್ಟ್ ಕಾರ್ನರ್ನಲ್ಲಿದ್ದ ಮಹೇಂದರ್ ಸಿಂಗ್, ನಬೀಬಖ್ಷ್ ಅವರನ್ನು ಟ್ಯಾಕಲ್ ಮಾಡಲು ಯತ್ನಿಸಿದರು. ಈ ವೇಳೆ ತಂಡದ ಎಲ್ಲಾ ಆಟಗಾರರು ನಬೀಬಕ್ಷ್ ಮೇಲೆ ಬಿದ್ದಿದ್ದರಿಂದ ಬುಲ್ಸ್ ತಂಡದ ಎಲ್ಲಾ ಆಟಗಾರರನ್ನು ಔಟ್ ಎಂದು ತೀರ್ಪು ನೀಡಲಾಯಿತು. ಇದರಿಂದ ಬೋನಸ್ ಸೇರಿದಂತೆ 8 ಅಂಕ ಬೆಂಗಾಲ್ಗೆ ಮತ್ತು ಒಂದು ಅಂಕ ಬುಲ್ಸ್ಗೆ ನೀಡಲಾಯಿತು.27-20 ಇದ್ದ ಬುಲ್ಸ್ ಮುನ್ನಡೆ ಈ ರೈಡ್ ನಂತರ 28-29 ತಲುಪಿತು. ಈ ದಿಢೀರ್ ತೀರ್ಪಿನಿಂದ ಗೊಂದಲಕ್ಕೊಳಗಾದ ಬೆಂಗಳೂರು ಬುಲ್ಸ್ ಬಳಿಕ ಆಟದ ಕಡೆ ಆಸಕ್ತಿ ಕಳೆದುಕೊಂಡಂತೆ ಕಂಡುಬಂದಿತಲ್ಲದೆ, ನಂತರ ಪಂದ್ಯದಲ್ಲಿ ಬೆಂಗಾಲ್ ವಾರಿಯರ್ಸ್ ಮುನ್ನಡೆ ಪಡೆಯುತ್ತ ಸಾಗಿತು.
32-38ರಲ್ಲಿ ಹಿನ್ನಡೆ ಅನುಭವಿಸಿದ್ದ ಬುಲ್ಸ್ ಅದ್ಭುತವಾಗಿ ಕಮ್ಬ್ಯಾಕ್ ಮಾಡಿ ಕೊನೆಯ 37 ಸೆಕೆಂಡ್ ವೇಳೆ 38-40ಕ್ಕೆ ತಂದು ನಿಲ್ಲಿಸಿತ್ತು. ಆದರೆ ಕೊನೆಯ 30 ಸೆಕೆಂಡ್ಗಳನ್ನು ವ್ಯರ್ಥ ಮಾಡಿದ ವಾರಿಯರ್ಸ್ ರೈಡರ್ ತಮ್ಮ ತಂಡ ಒಂದು ಅಂಕದಿಂದ ಗೆಲ್ಲಲು ನೆರವಾದರು.
ಬೆಂಗಳೂರು ತಂಡದ ಪರ ಪವನ್ ಶೆರಾವರ್ 13 , ಚಂದ್ರನ್ ರಂಜಿತ್ 8, ಸೌರಬ್ ನಂಡಲ್ 4 ಟ್ಯಾಕಲ್, ಮಹೇಂದ್ರ ಮತ್ತು ಅಂಕಿತ್ ತಲಾ 2 ಟ್ಯಾಕಲ್ ಅಂಕ ಸಂಪಾದಿಸಿದರು.ಇತ್ತ ಬೆಂಗಾಲ್ ವಾರಿಯರ್ಸ್ ಪರ ಮಣೀಂದರ್ ಸಿಂಗ್ 9, ಸುಖೇಶ್ ಹೆಗ್ಡೆ 7, ನಬೀಬಖ್ಷ್ 6 , ಮೊಹಜೆರ್ಮಿಘನಿ 3, ಅಮಿತ್ ಮತ್ತು ರಾಣಾ ಸಿಂಗ್ ತಲಾ 2 ಟ್ಯಾಕಲ್ ಅಂಕ ಪಡೆದರು. ವಿವಾದಿತ 8 ಹೆಚ್ಚುವರಿ ಅಂಕ ಪಡೆದಿದ್ದರಿಂದ ಬೆಂಗಾಲ್ ವಾರಿಯರ್ಸ್ ಗೆಲ್ಲುವಂತಾಯಿತು.
