ನವದೆಹಲಿ (New Delhi): ಶ್ರೀಲಂಕಾ ಪ್ರವಾಸದಲ್ಲಿರುವ ಭಾರತ ಮಹಿಳಾ ಕ್ರಿಕೆಟ್‌ ತಂಡ ಶುಭಾರಂಭ ಮಾಡಿದೆ. ಮೂರು ಪಂದ್ಯಗಳ ಟಿ20 ಕ್ರಿಕೆಟ್‌ ಸರಣಿಯ ಮೊದಲ ಪಂದ್ಯದಲ್ಲಿ ಹರ್ಮನ್‌ಪ್ರೀತ್‌ ಕೌರ್‌ ಸಾರಥ್ಯದ ಭಾರತ ಮಹಿಳಾ ಕ್ರಿಕೆಟ್‌ ತಂಡ 34 ರನ್‌ಗಳ ಜಯ ದಾಖಲಿಸಿದೆ.
ಆ ಮೂಲಕ ಸರಣಿಯಲ್ಲಿ ಭಾರತ 1-0 ಮುನ್ನಡೆ ಸಾಧಿಸಿದೆ. ಟಾಸ್‌ ಗೆದ್ದು ಬ್ಯಾಟಿಂಗ್‌ ಆಯ್ಕೆ ಮಾಡಿಕೊಂಡ ಭಾರತ ಮಹಿಳಾ ತಂಡ, ತನ್ನ 20 ಓವರ್‌ಗಳಲ್ಲಿ 6 ವಿಕೆಟ್‌ಗೆ 138 ರನ್‌ಗಳ ಸಾಧಾರಣ ಮೊತ್ತ ಮಾತ್ರವೇ ದಾಖಲಿಸಲು ಶಕ್ತವಾಯಿತು. ಎಡಗೈ ಸ್ಪಿನ್ನರ್‌ ಇನೋಕ ರಣವೀರ 30ಕ್ಕೆ 3 ವಿಕೆಟ್‌ ಪಡೆಯುವ ಮೂಲಕ ಭಾರತೀಯ ಬ್ಯಾಟರ್‌ಗಳ ಪರಾಕ್ರಮಕ್ಕೆ ಬ್ರೇಕ್‌ ಹಾಕಿದರು.
ಶಫಾಲಿ ವರ್ಮಾ (31), ಕ್ಯಾಪ್ಟನ್ ಹರ್ಮನ್‌ಪ್ರೀತ್‌ (22) ಮತ್ತು ಜೆಮಿಮಾ ರೊಡ್ರಿಗಸ್‌ (36*) ಅವರ ಜವಾಬ್ದಾರಿಯುತ ಬ್ಯಾಟಿಂಗ್‌ ನೆರವಿನಿಂದ ಭಾರತ ತಂಡ ಸವಾಲಿನ ಮೊತ್ತ ಕಲೆಹಾಕಿತು. ಆಲ್‌ರೌಂಡರ್‌ಗಳಾದ ಪೂಜಾ ವಸ್ತ್ರಕಾರ್‌ (14) ಮತ್ತು ದೀಪ್ತಿ ಶರ್ಮಾ (17*) ಕೂಡ ಉಪಯುಕ್ತ ಕೊಡುಗೆ ಸಲ್ಲಿಸಿದರು.
ಟೀಮ್ ಇಂಡಿಯಾ ಸಂಘಟಿಸಿದ ಶಿಸ್ತಿನ ಬೌಲಿಂಗ್‌ ದಾಳಿ ಎದುರು ಶ್ರೀಲಂಕಾ ಸುಸ್ತಾಯಿತು. ಎಡಗೈ ಸ್ಪಿನ್ನರ್‌ ರಾಧಾ ಯಾದವ್, ತಮ್ಮ ನಾಲ್ಕು ಓವರ್‌ಗಳಲ್ಲಿ 22 ರನ್‌ ನೀಡಿ 2 ವಿಕೆಟ್‌ ಪಡೆಯುವ ಮೂಲಕ ಯಶಸ್ವಿ ಬೌಲರ್‌ ಎನಿಸಿದರು. ಪವರ್‌-ಪ್ಲೇ ಒಳಗೆ ದಾಳಿಗಿಳಿದ ರಾಧಾ, ಎದುರಾಳಿ ತಂಡದ ನಾಯಕಿ ಹಾಗೂ ಅಪಾಯಕಾರಿ ಬ್ಯಾಟರ್‌ ಚಾಮರಿ ಅಟಪಟ್ಟು (16) ಮತ್ತು ಹರ್ಷಿತಾ ಮಾದವಿ (10) ಅವರನ್ನು ಕೇವಲ 3 ಎಸೆತಗಳಲ್ಲಿ ಔಟ್‌ ಮಾಡಿ ಭಾರತ ತಂಡಕ್ಕೆ ಮೇಲುಗೈ ತಂದರು.
139 ರನ್‌ಗಳ ಗುರಿ ಬೆನ್ನತ್ತಿದ್ದ ಶ್ರೀಲಂಕಾ ತಂಡ 7 ಓವರ್‌ಗಳ ಮುಕ್ತಾಯಕ್ಕೆ 3 ವಿಕೆಟ್‌ ನಷ್ಟದಲ್ಲಿ ಕೇವಲ 27 ರನ್‌ ಮಾತ್ರವೇ ಗಳಿಸಿತ್ತು. ಇದರಿಂದ ಚೇತರಿಸಲಾಗದೆ ರಕ್ಷಣಾತ್ಮಕ ಆಟದ ಮೊರೆ ಹೋಗಿ 20 ಓವರ್‌ಗಳಲ್ಲಿ 5 ವಿಕೆಟ್‌ಗೆ 104 ರನ್‌ಗಳನ್ನು ಮಾತ್ರವೇ ಗಳಿಸಲು ಶಕ್ತವಾಯಿತು. ದೀಪ್ತಿ ಶರ್ಮಾ (9ಕ್ಕೆ 1) ಮತ್ತು ಪೂಜಾ ವಸ್ತ್ರಕಾರ್‌ (13ಕ್ಕೆ 1) ಇನಿಂಗ್ಸ್‌ನ ಮಧ್ಯದ ಓವರ್‌ಗಳಲ್ಲಿ ಕಟ್ಟುನಿಟ್ಟಿನ ದಾಳಿ ನಡೆಸಿದರು. ದೀಪ್ತಿ ಶರ್ಮಾ, ಇನಿಂಗ್ಸ್‌ನ ಎರಡನೇ ಓವರ್‌ನಲ್ಲೇ ಎದುರಾಳಿ ತಂಡದ ಓಪನರ್‌ ವಿಷ್ಮಿ ಗುಣರತ್ನೆ (0) ವಿಕೆಟ್‌ ಪಡೆದು ಉತ್ತಮ ಆರಂಭ ಕೊಟ್ಟರು.
ಆತಿಥೇಯ ಶ್ರೀಲಂಕಾ ತಂಡದ ಪರ ಏಕಾಂಗಿ ಹೋರಾಟ ನಡೆಸಿದ ಮಧ್ಯಮ ಕ್ರಮಾಂಕದ ಬ್ಯಾಟರ್‌ ಕವಿಶಾ ದಿಲ್ಹಾರಿ, ಕ್ರೀಸ್‌ನಲ್ಲಿ ಭದ್ರವಾಗಿ ನೆಲೆನಿಂತು ಎನ್‌ ಹೆಕ್ಕಿದರು. 49 ಎಸೆತಗಳಲ್ಲಿ 4 ಫೋರ್‌ಗಳೊಂದಿಗೆ ಅಜೇಯ 47 ರನ್‌ ಗಳಿಸಿದರಾದರೂ, ಅವರ ಆಮೆ ಗತಿಯ ಬ್ಯಾಟಿಂಗ್‌ ತಂಡಕ್ಕೆ ಜಯ ತಂದುಕೊಡಲಿಲ್ಲ. ಕೊನೇ 5 ಓವರ್‌ಗಳಲ್ಲಿ ಶ್ರೀಲಂಕಾ ತಂಡಕ್ಕೆ 78 ರನ್‌ಗಳಿಸುವ ಕಠಿಣ ಸ್ಥಿತಿ ಎದುರಾಗಿತ್ತು.
ಸಂಕ್ಷಿಪ್ತ ಸ್ಕೋರ್‌
ಭಾರತ: 20 ಓವರ್‌ಗಳಲ್ಲಿ 6 ವಿಕೆಟ್‌ಗೆ 138 ರನ್‌ (ಶೆಫಾಲಿ ವರ್ಮಾ 31, ಹರ್ಮನ್‌ಪ್ರೀತ್‌ ಕೌರ್‌ 22, ಜೆಮಿಮಾ ರೊಡ್ರಿಗಸ್‌ 36*, ದೀಪ್ತಿ ಶರ್ಮಾ 17*; ಒಶಾದಿ ರಣಸಿಂಘೆ 22ಕ್ಕೆ 2, ರಣವೀರ 30ಕ್ಕೆ 3, ಚಾಮರಿ ಅಟಪಟ್ಟು 7ಕ್ಕೆ 1).
ಶ್ರೀಲಂಕಾ: 20 ಓವರ್‌ಗಳಲ್ಲಿ 5 ವಿಕೆಟ್‌ಗೆ 104 ರನ್‌ (ಚಾಮರಿ ಅಟಪಟ್ಟು 16, ಕವಿಶಾ ದಿಲ್ಹಾರಿ 47*; ರಾಧಾ ಯಾದವ್ 22ಕ್ಕೆ 2, ಶಫಾಲಿ ವರ್ಮಾ 10ಕ್ಕೆ 1, ಪೂಜಾ ವಸ್ತ್ರಕಾರ್‌ 13ಕ್ಕೆ 1, ದೀಪ್ತಿ ಶರ್ಮಾ 9ಕ್ಕೆ 1).
ಪಂದ್ಯಶ್ರೇಷ್ಠ: ಜೆಮಿಮಾ ರೊಡ್ರಿಗಸ್‌.
